नंदुरबार : कोरोना महामारीमुळे जिल्हा रुग्णालयाला कोविड हाॅस्पिटलचा दर्जा मिळाला आहे. यातून येथील सुविधा दिवसेंदिवस वाढत आहेत. दरम्यान, काही ठिकाणी मात्र असुविधा असल्याचे अद्यापही समोर आले असून, एकाच आवारात स्वॅब कलेक्शन आणि लसीकरण अशी स्थिती येथे आहे.
१६ जानेवारीपासून जिल्ह्यातही लसीकरण सुरू झाले होते. या लसीकरणासाठी प्रारंभीपासून जिल्हा रुग्णालयातील अतिरिक्त शल्य चिकित्सक कार्यालयाचा आवार अधिग्रहीत करण्यात आला. येथील तीन खोल्यांमध्ये नोंदणी, वेटिंग रूम आणि लसीकरण असे कक्ष तयार केले गेले आहेत. याठिकाणी तूर्तास लस घेण्यासाठी दिवसभरात ५००च्या जवळपास नागरिक हजेरी लावत आहेत. दरम्यान, याच परिसरापासून काही अंतरावर असलेल्या महिला रुग्णांच्या पुढील बाजूस रक्तपेढीत स्वॅब कलेक्शन सेंटर करून कोरोना चाचणी करण्यात येत आहे. यामुळे एकाच परिसरात बऱ्याचवेळा गोंधळही होत असल्याचे समोर येत आहे. ज्यांना चाचणी करायची आहे तेही लसीकरणाच्या ठिकाणी येऊन थांबत असल्याने या दोन ठिकाणांबाबत योग्य तो निर्णय घेण्याची अपेक्षा व्यक्त करण्यात येत आहे. स्वॅब सेंटर परिसरातच कोविड वाॅर्ड असल्याने कोरोना चाचणी कक्ष इतरत्र हलविण्याची मागणी सातत्याने होत आहे.
जिल्ह्यात कोरोना लसीकरणाचा वेग दिवसेंदिवस वाढता आहे. २० हजारच्या जवळपास ज्येष्ठांचे लसीकरण पूर्ण करण्यात आले आहे, तर दुसरीकडे हेल्थ वर्कर आणि फ्रंटलाइन वर्कर यांचे लसीकरण पूर्ण करण्यात येत आहे. ज्येष्ठांचा पहिला डोस पूर्ण झाल्याने दुसरा डोस घेण्यासाठी गर्दी होत असल्याची माहिती देण्यात आली आहे. दरम्यान, आता दुसऱ्या डोससाठी नागरिक येऊ लागले आहेत. यातून सध्या कोरोना रुग्णसंख्याही वाढत आहे. बाधितांच्या संपर्कात आल्याने अनेकजण स्वॅब तपासणी करून घेत आहेत. यासाठी नंदुरबार जिल्हा रुग्णालयात स्वतंत्र व्यवस्था आहे. परंतु ही व्यवस्था कोरोना वाॅर्ड आणि नेत्रकक्ष या परिसरात आहे. येथून काही अंतर चालत गेल्यानंतर कोरोना लसीकरण केंद्र आहे. यातून या भागात सातत्याने नागरिकांची वर्दळ असते. यातून कोरोनाचा फैलाव हा अधिक तीव्रतेने होण्याची शक्यता असल्याने स्वॅब कलेक्शन सेंटर इतरत्र हलविण्याची मागणी करण्यात येत आहे.
महिला व पुरुष एकाच ठिकाणी
लसीकरण आणि कोरोना चाचणी करण्याच्या ठिकाणांवर महिला आणि पुरुषांसाठी स्वतंत्र अशी व्यवस्था नसल्याचे समोर आले आहे. यातून महिला आणि पुरुष हे एकाच वेळी या परिसरात रांगेत उभे असल्याचे दिसून येतात. कोरोना चाचणीच्या ठिकाणी सावलीही नसल्याचे दिसून आले.
कर्मचारी संख्याही कमी
कोरोनाबाधित रुग्णांची संख्या वाढल्यानंतर जिल्हा रुग्णालयातील कामकाज वाढले आहेत. यात लसीकरण केंद्र, कोरोना चाचणी आणि नियमित रुग्ण सेवा यासाठी मनुष्यबळाची गरज भासत आहे. परंतु स्टाफ अपुरा पडत असल्याने अडचणी येत आहेत. कोरोना चाचणी करण्यासाठी एकच व्यक्ती आहे.