शहाद्यात शिवस्मारक परिसर सुशोभिकरणाचे भूमिपूजन
By लोकमत न्यूज नेटवर्क | Published: March 5, 2021 04:31 AM2021-03-05T04:31:48+5:302021-03-05T04:31:48+5:30
शहादा-दोंडाईचा रस्त्यावर शहराच्या मुख्य प्रवेशद्वाराजवळ छत्रपती शिवाजी महाराजांचा पुतळा लोकवर्गणीतून बसविण्यात येणार असून यासाठी पालिका प्रशासनाने सुमारे १० हजार ...
शहादा-दोंडाईचा रस्त्यावर शहराच्या मुख्य प्रवेशद्वाराजवळ छत्रपती शिवाजी महाराजांचा पुतळा लोकवर्गणीतून बसविण्यात येणार असून यासाठी पालिका प्रशासनाने सुमारे १० हजार स्क्वेअर फूट जागा शिवस्मारक समितीला उपलब्ध करून दिली आहे. या नियोजित शिवस्मारक परिसराच्या जागेत पालिकेच्या वतीने सुशोभिकरण करण्यात येणार असून आकर्षक रोशणाईसह येथे भेट देणाऱ्या नागरिकांना प्रेक्षक गॅलरी करण्यासह छत्रपती शिवाजी महाराजांच्या जीवनचरित्रातील अनेक महत्त्वाच्या घटना चित्रमय स्वरूपात नागरिकांसाठी ठेवण्यात येणार आहेत. या सुशोभिकरणाच्या कामाला पालिकेतील सर्वच पक्षाच्या नगरसेवकांनी एकमुखाने ठराव मंजूर करीत पाठिंबा दिला असल्याने आता सुमारे ५३ लाख ५१ हजार ३४० रुपये खर्चाला मान्यता दिली आहे. गुरुवारी मान्यवरांच्या हस्ते भूमिपूजन करण्यात आले.
छत्रपती शिवाजी महाराजांचा अश्वारूढ पुतळा शहरात असावा यासाठी नगराध्यक्ष मोतीलाल पाटील यांच्या अध्यक्षतेखाली शिवस्मारक समितीची स्थापना करण्यात आली आहे. लोकवर्गणीतून सुमारे ५० लाख रुपये खर्चाचा सुमारे चौदा फूट उंचीचा व पावणेतीन टन वजनाचा अष्टधातूपासून तयार करण्यात आलेल्या पुतळ्याची निर्मिती मुंबई येथील शिल्पकार चंद्रजित यादव हे तयार करीत आहेत. शिवस्मारक समितीच्यावतीने या पुतळ्यासाठी लोकवर्गणीतून जमा झालेले २५ लाख रुपयांचा धनादेश अनामत म्हणून देण्यात आलेला आहे. एप्रिल महिन्याच्या अखेरपर्यंत या पुतळ्याची निर्मिती पूर्ण होणार असून तो शहाद्याला आणण्यात येणार आहे.
पालिका प्रशासनाच्या वतीने १ मेपर्यंत संपूर्ण परिसराचे सुशोभिकरण व विद्युतीकरण करण्याचे नियोजन करण्यात आले असून शिवस्मारक समिती व पालिका प्रशासनाच्या वतीने १५ मेपर्यंत या परिसरात भव्य अश्वारूढ छत्रपती शिवाजी महाराजांचा पुतळा बसविला जाणार आहे.
गुरुवारी झालेल्या भूमिपूजनप्रसंगी जि.प.चे कृषी सभापती अभिजित पाटील, पालिकेचे गटनेते प्रा.मकरंद पाटील, धनंजय वडनेरे, नगर अभियंता संदीप टेंभेकर, राजेंद्र जोहरी, प्रा.नेत्रदीपक पवार, उमेश पाटील, ठेकेदार सिद्धार्थ साळुंखे, शिवस्मारक समितीचे मनोहर सैंदाणे यांच्यासह पालिकेचे नगरसेवक विविध पक्षाचे पदाधिकारी उपस्थित होते
शहरात छत्रपती शिवाजी महाराजांचा पुतळा असावा ही नागरिकांची जुनी मागणी होती. पालिकेतील सर्व पक्षाचे नगरसेवक व शिवस्मारक समितीच्या माध्यमातून परिसराचे सुशोभिकरण केले जाणार आहे. लोकवर्गणीच्या माध्यमातून पुतळा बसविण्यात येणार असल्याने शहरातील दानशूर नागरिकांसह शिवप्रेमी नागरिकांनी समितीला आर्थिक सहाय्य करावे. १५ मेपर्यंत पुतळा बसविण्यात येणार आहे.
-अभिजित पाटील, सभापती, कृषी व पशुसंवर्धन समिती, जि.प. नंदुरबार
शहरातील नागरिकांच्या मागणीला पालिकेच्या सर्व नगरसेवकांनी पाठिंबा देत लोकभावनेचा आदर करीत छत्रपती शिवाजी महाराजांचा पुतळा बसविण्यात येणार आहे. हे शिवस्मारक भविष्यातील पिढीसाठी मार्गदर्शक ठरणार आहे. कुठल्याही प्रकारचे राजकारण न करता सर्वांच्या सहकार्याने एक आदर्श स्मारक म्हणून या शिवस्मारकाचा लौकिक असणार आहे.
-प्रा.मकरंद पाटील, गटनेते, शहादा नगरपालिका