नवापूर वन विभागाकडून मिळालेल्या माहितीनुसार, नवापूर तालुक्यात दुधवे गावात अवैध लाकूड तस्करी व्यवसाय मोठ्या प्रमाणात फोफावली आहे. या कारवाईत संदीप वळवी, दशरथ वसावे, रोहिदास पाडवी वीरजी वळवी (सर्व राहणार दुधवे) यांच्या घराची झडती घेतली असता साग नग ४४८, सिसम नग १० सोफा, पलंग नग असे एकूण अंदाजे ७ ते ८ घनमीटर साइज, गोल व फिनिश टिंबर माल व एक रंधा मशीन मिळून आली. सदर मालाची बाजारभावानुसार अंदाजित किंमत साधारणत: ९ लाख रुपये आहे. नवापूर वन विभागाने सातत्याने अवैध लाकूड तस्करी, वाहतुकीसंदर्भात सातत्याने कारवाई करण्याची गरज व्यक्त केली जात आहे. दोन-तीन महिन्यांच्या विश्रांतीनंतर केलेली ही मोठी कारवाई दिसून येत आहे, परंतु अजूनही ग्रामीण व शहरी भागात अवैध लाकूड तस्करी करणारे मोठ्या प्रमाणात असल्याचे बोलले जाते.
दुधवे गावातून चार ठिकणी अवैधरीत्या लाकूड तस्करी करून फर्निचर बनविण्याचे अवैध कारखाने सुरू होते. यात सागवानी, सिसम, शिवण या प्रजातीचे लाकूड इमारती, चौफट नग, गोल नग तयार झालेले फर्निचर, रंधा मशीन असा मुद्देमाल जप्त करण्यात आला आहे. या कारवाईने वन तस्करांचे धाबे दणाणले आहे. या कारवाईत ५० वनविभागाचे अधिकारी कर्मचाऱ्यांचा समावेश होता. साधारण: पाच गाड्यांत लाकूड भरून नवापूर वन आगारात पंचनामा करून माल जमा करण्यात आला. या कारवाईत नंदुरबार, नवापूर, चिंचपाडा, शहादा गस्ती पथकाचा समावेश होता.
नवापूर तालुक्यातील दुधवे गावामध्ये मोठ्या प्रमाणामध्ये अवैध लाकूड तस्करीचा व्यवसाय चालत होता. आतापर्यंत नवापूर तालुक्यातील या गावात वन विभागाने मोठी कारवाई केली नाही. पहिल्यांदाच या गावातील चार-पाच घरांची झाडाझडती करून वनविभागाने मोठ्या प्रमाणात सागवानी, सिसम, इमारती लाकूड फर्निचर रंधा मशीन लाकूड जप्त केल्याने खळबळ उडाली आहे. दुधवे गावात जाऊन पोलीस पाटील दुधवे, सरपंच दुधवे यांची मदत घेऊन वन विभागाने कारवाई केली.
अवैध कारवाई संदर्भात या क्रमांकावर संपर्क करावा
साहाय्यक वनसंरक्षक नंदुरबार वनविभाग शहादा यांजकडून जनतेस आवाहन करण्यात येते की, वन व वन्यजीव तसेच अवैध लाकूड वाहतूक संबंधित कुठला गैरप्रकार निदर्शनास आल्यास तत्काळ टोल फ्री नंबर १९२६ वर संपर्क करावा, असे आवाहन करण्यात आले आहे.
गुजरात राज्यातून मोठ्या प्रमाणात वृक्षतोड
नवापूर तालुक्यामध्ये मोठ्या प्रमाणामध्ये ग्रामीण भागात व शहरी भागात अवैध लाकूड तस्करीचा व्यवसाय फोफावला आहे. या ठिकाणी शेजारील गुजरात राज्यातून मोठ्या प्रमाणात साग, सिसम, खैर, शिवण अशा मौल्यवान प्रजातीची लाकूडतोड करून फर्निचर तयार करून इतर राज्यांत रवाना केले जात असल्याचे मोठे रॅकेट असल्याचे बोलले जात आहे. नवापूर तालुका महाराष्ट्र-गुजरात सीमावर्ती भागात असल्याने महाराष्ट्र, गुजरात राज्यातील जंगलात मोठ्या प्रमाणात वृक्षतोड होत असल्याने महाराष्ट्र व गुजरात वन विभागाने संयुक्त कारवाई करून वन तस्करांवर ठोस मोहीम राबवण्याची गरज व्यक्त होत आहे.
नवापूर तालुक्यातील फर्निचर इतर राज्यात रवाना
नवापूर तालुक्यातील ग्रामीण व शहरी भागात मोठ्या प्रमाणात अवैध लाकूड तस्करी करून फर्निचर तयार करण्याचे कारखाने उभारण्यात आलेले आहेत. सागवान, शिसम, शिवण अशा मौल्यवान प्रजातीचे फर्निचर तयार करून रात्री वाहनाने इतर राज्यात लाकूड व फर्निचर तस्करी केली जाते. या संदर्भातदेखील वन विभागाने कारवाई करण्याची गरज आहे.
वणवा पेटल्याच्या घटनांवर नियंत्रण नाही
नवापूर तालुक्यात मोठ्या प्रमाणात गुजरात-महाराष्ट्र सीमावर्ती भागात जंगल असल्याने येथे वणवा पेटल्याच्या घटना घडत आहेत. परंतु याकडे वन विभागाचे अक्षम्य दुर्लक्ष दिसून येत असल्याने अनेक मौल्यवान लाकूड, वनसंपत्ती, वनौषधी नष्ट होत आहेत. तसेच वन्य प्राण्यांनादेखील याचा मोठा धोका आहे. त्यामुळे वणवा पेटल्याच्या घटनांवर लक्ष देऊन तत्काळ वणवा विझवण्यासाठी कारवाई करण्याची मागणी वन्यप्रेमींकडून केली जात आहे.