कंधार : तालुक्यातील ९७ ग्रामपंचायतींमधील ८४१ सदस्यपदांसाठी गावपुढाऱ्यांना नामनिर्देशनपत्रे दाखल करताना मोठी कसरत करावी लागत आहे. त्यातच १२ गावांतील ५४ मतदान केंद्रे संवेदनशील असल्याचे समोर आले आहे. त्यात दिग्गज पुढाऱ्यांच्या गावांचा समावेश असल्याने मतदान प्रक्रिया शांततेत पार पाडण्यासाठी पोलीस बंदोबस्त अधिक राहणार असल्याचे समजते.
तालुक्यातील ९७ ग्रामपंचायतींच्या निवडणुकीत गावपुढाऱ्यांचा राजकीय कस लागणार आहे. गावाची सत्ता ताब्यात घेण्यासाठी मोठी राजकीय व्यूहरचना करीत असताना मागील निवडणुकीत विहित मुदतीत निवडणूक खर्च सादर न केल्याने १२४ जणांना अपात्र ठरविण्यात आले. त्यामुळे यावेळी उमेदवारी निश्चित करून पॅनल सक्षम करण्यात अडथळा आला. अचानक नवीन उमेदवारांची शोधाशोध करावी लागली. कागदपत्रे जमवाजमव करताना दमछाक सुरू झाली. पुन्हा शांततेत निवडणुका पार पाडण्यासाठी प्रशासनाने जोरदार तयारी चालविली आहे. तालुक्यात निवडणूक होत असलेल्या ९७ ग्रामपंचायत गावांत ३२८ मतदान केंद्रे आहेत. त्यात कुरुळा गावातील ९ मतदान केंद्रे संवेदनशील आहेत. शिराढोण- ९, हाळदा- ५, काटकंळबा- ४, पानभोसी- ४, फुलवळ- ४, चिखली- ४, नंदनवन- ३, धानोराकौठा- ३, मरशिवणी- ३, वहाद- ३, गोणार- ३, अशी १२ गावांतील ५४ मतदान केंद्रे संवेदनशील आहेत. त्यामुळे प्रशासन व पोलिसांची या केंद्रावर करडी नजर राहणार आहे. संवेदनशील मतदान केंद्रे असलेल्या गावांत खा. प्रताप पा. चिखलीकर, आ. श्यामसुंदर शिंदे, माजी आ. ईश्वरराव भोसीकर, काँग्रेसचे तालुकाध्यक्ष बालाजी पांडागळे आदी दिग्गज पुढाऱ्यांच्या गावांचा समावेश आहे.
९७ ग्रामपंचायतींमध्ये १ लाख ५२ हजार मतदार
जानेवारी महिन्यात होणाऱ्या ९७ ग्रा.पं. निवडणुकीत एकूण १ लाख ५२ हजार ७६ मतदार आपला मतदानाचा हक्क बजावतील. त्यात पुरुष ७९ हजार ९४७, महिला ७२ हजार ७२ व इतर ७ मतदारांचा समावेश आहे. प्रत्येक मतदारास प्रत्यक्ष भेटून आपली भूमिका सांगताना उमेदवाराची मोठी कसरत होणार, असेच संकेत आहेत.