भोकर : तालुक्यातील ग्रामपंचायत निवडणुकीच्या अनुषंगाने सदस्यपदासाठी इच्छुक ३५२ जणांनी मंगळवारी नामनिर्देशनपत्र दाखल केल्यानंतर आतापर्यंत एकूण ४३० अर्ज प्राप्त झाल्याची माहिती तहसीलदार भरत सूर्यवंशी यांनी दिली आहे.
तालुक्यातील विविध ६३ ग्रामपंचायतींतर्गत १९३ वाॅर्डांत ५१३ सदस्यपदासाठी निवडणुका होत आहेत. निवडणूक आयोगाच्या कार्यक्रमानुसार नामनिर्देशनपत्र दाखल करावयाच्या सातव्या दिवशी तब्बल ३५२ जणांनी नामनिर्देशनपत्र दाखल केले आहेत. यापूर्वी ७८ जणांनी अर्ज दाखल केले होते. त्यामुळे आतापर्यंत एकूण ४३० नामनिर्देशनपत्रे दाखल झाली आहेत. विशेष म्हणजे तालुक्यातील ६३ ग्रामपंचायतींपैकी फक्त ४५ ग्रामपंचायतींचेच अर्ज प्राप्त झाले आहेत. यात तालुक्यातील किनी ग्रामपंचायतीतून सर्वाधिक २८ अर्ज दाखल झाले, तर तालुक्यातील १८ ग्रामपंचायतींमधून अद्यापपर्यंत एकही नामनिर्देशनपत्र दाखल झाले नाही.
नामनिर्देशनपत्र सादर करण्यासाठी तहसील कार्यालयात २२ टेबल लावण्यात आले आहेत. इच्छुक उमेदवारांना नामनिर्देशनपत्र दाखल करण्यापूर्वी ऑनलाइन अर्ज भरण्याच्या किचकट प्रक्रियेतून जावे लागले. त्यातच ऑनलाइन अर्जासाठी दिलेल्या
गती दिवसभर संथगतीने चालल्यामुळे ठिकठिकाणी गर्दी झाली होती. त्यातच आयोगाच्या नवीन आदेशानुसार अर्ज दाखल करावयाच्या शेवटच्या दिवशी पारंपरिक पद्धतीने ऑफलाइन अर्ज दाखल करण्याबरोबरच सायंकाळी ५.३० वाजेपर्यंतची वेळ वाढवून दिल्याने इच्छुकांना दिलासा मिळाला आहे.