आशीष दुबे
नागपूर : उत्तर प्रदेशातील वाराणसी व प्रयागराज आदी शहरांतून येणाऱ्या खासगी ट्रॅव्हल्स बसमध्ये कोरोनाच्या मार्गदर्शक सूचनांकडे दुर्लक्ष केले जात आहे. प्रवाशांकडून मनमानी प्रवास भाडे वसूल केले जात आहे. प्रवाशांकडून लगेजचे अतिरिक्त शुल्क वसूल केले जात आहे. प्रवाशांनी विरोध केल्यास अर्धा प्रवासातूनच उतरविण्याची धमकी दिली जात आहे.
खासगी बसेसमध्ये कोरोना नियमांचे दुर्लक्ष होत असले तरी पोलीस व प्रशासनाकडून त्यांच्याकडे दुर्लक्ष केले जात आहे. आरटीओचे अधिकारीसुद्धा वाहनांची तपासणी करत नाही. ‘लोकमत’च्या पथकाने खासगी प्रवासी वाहनांमध्ये होत असलेल्या मनमानी संदर्भात आढावा घेतला असता, स्लीपर बसच्या एका सीटवर दोन व्यक्तीच्याजागी तिघांना बसविले जात आहे. बसमध्ये कुठलीही साफसफाई नसते. बस सॅनिटाईज केली जात नाही. प्रवाशांना मास्कचे बंधन नसते. बसमध्ये आसन व्यवस्था अतिशय निकृष्ट दिसून आली. वाराणसीहून नागपूरला येत असलेल्या बसचे भाडे प्रत्येक ऑपरेटरचे वेगवेगळे आहे. नॉन एसी सिटिंगचे भाडे १३५० व नॉन एसी स्लीपरचे भाडे १६५० रुपये वसूल केले जात आहे. एसी बसचे भाडे २२०० ते २५०० रुपयांपर्यंत वसूल केले जात आहे. सोबतच बसमध्ये बसण्यापूर्वी प्रवाशांकडून प्रतिबॅग २० रुपये वसूल केले जात आहे. याला विरोध केल्यास प्रवाशांना धमकी दिली जाते की लगेजचे भाडे न दिल्यास सामान ठेवू दिले जाणार नाही.
- रेल्वेचे रिझर्वेशन मिळत नसल्यामुळे उचलत आहे लाभ
कोरोनामुळे रेल्वे गाड्या फार कमी धावत आहे. रिझर्व्हेशन कन्फर्म असेल तरच प्रवास शक्य आहे. ज्या प्रवाशांना रेल्वेचे रिझर्व्हेशन मिळत नाही, ते बसमध्ये प्रवास करतात. त्यात बहुतांश लोक मजूरवर्गातील असतात. लॉकडाऊन लागल्यामुळे अनेक लोकं शहरातून आपल्या गावी परतले होते. ते आता शहरात परतत आहे.