नागपूर : कोरोनावर नियंत्रण मिळविण्यासाठी कोविड केअर सेंटरची भूमिका महत्त्वाची असते, परंतु डिसेंबरमध्ये रुग्णसंख्या कमी होताच, पाचपावली सेंटर वगळता आमदार निवास, वनामती, सिम्बायोसिस व ओरीएन्ट ग्रॅण्ड हॉटेल बंद करण्यात आले. आता पुन्हा बाधितांची संख्या वाढत असताना, हे सेंटर सुरू करण्याचे प्रशासन विचार करीत आहे. विशेष म्हणजे, यातील आमदार निवासात खेळाडू, तर वनामतीमध्ये प्रशिक्षणासाठी आलेले कर्मचारी थांबलेले आहेत, इतर सेंटर रुग्णांसाठी बंद आहेत. यामुळे पुन्हा ही यंत्रणा उभी करणे प्रशासनाला कठीण जाणार आहे.
नागपूर जिल्ह्यात सलग तिसऱ्या दिवशी आज ७००वर कोरोनाबाधितांची नोंद झाली, तर मागील सात दिवसांपासून दैनंदिन बाधितांच्या संख्येत ५००ची भर पडत आहे. बाधितांची एकूण संख्या १,४३,८४३ झाली आहे. सध्या ६,२६२ रुग्ण उपचाराखाली आहेत. यातील लक्षणे नसलेली किंवा सौम्य लक्षणे असलेली ४,४५३ रुग्ण होम आयसोलेशनमध्ये, तर १,८०९ रुग्ण विविध शासकीयसह खासगी रुग्णालयात भरती आहेत, परंतु ज्या रुग्णांच्या घरी आयसोलेशनच्या सोयी नाहीत, तेही रुग्ण घरी आहेत. परिणामी, कुटुंबात संसर्ग वाढण्याचा धोका वाढला आहे. विशेष म्हणजे, मनपाच्या आरोग्य विभागाने दरम्यानच्या काळात गंभीरतेने घेतले नव्हते, परंतु आता बाधितांची संख्या वाढताच, कोविड केअर सेंटर सुरू करण्याचा विचार करीत आहेत.
- पाचपावलीमध्ये २९ रुग्ण
‘लोकमत’ चमूने सोमवारी आमदार निवास, वनामती, ओरीएन्ट ग्रॅण्ड हॉटेल, सिम्बायोसिस, व्हीएनआयटी व पाचपावली कोविड केअर सेंटरला भेट दिली. यातील एकट्या पाचपावली सेंटरमध्ये २९ रुग्ण वगळता इतर पाचही सेंटर रुग्णांसाठी बंद आहेत. यातील आमदार निवासातील इमारत क्रमांक २ व ३ मध्ये दिव्यांग क्रिकेट खेळाडूंना ठेवण्यात आले आहे, तर वनामतीच्या वसतिगृहात प्रशिक्षणासाठी आलेले कर्मचारी आहेत. उर्वरित सेंटर रुग्णांसाठी बंद आहेत.
- ग्रामीणमधील तीनच सेंटर सुरू
नागपूर जिल्ह्यात १४ तालुके आहेत. कोरोनाच्या आणीबाणीच्या काळात प्रत्येक तालुकास्तरावर कोविड केअर सेंटर सुरू करण्यात आले आहेत. सध्याच्या स्थितीत तीनच तालुक्यांत कोविड केअर सेंटर सुरू आहेत. यात भिवापूर तालुक्यातील सेंटरमध्ये ३, हिंगणा सेंटरमध्ये ५ तर उमरेड सेंटरमध्ये ३ रुग्ण आहेत. सध्याच्या स्थितीत ग्रामीणमध्ये १,०९३ रुग्ण आहेत. यामुळे कोरोनाला नियंत्रणात आणण्यास येथेही सेंटर सुरू करणे गरजेचे झाले आहे.
- कोविड केअर सेंटरमधील स्थिती
सेंटरस्थिती
आमदार निवास बंद
वनामती बंद
ओरीएन्ट ग्रॅण्ड हॉटेलबंद
सिम्बायोसिस बंद
व्हीएनआयटीबंद
पाचपावली २९ रुग्ण