एका अधिकाऱ्याकडे तीन पदाचा कार्यभार

नगर परिषदेचा कार्यभार सध्या प्रभारी अधिकाऱ्यांच्या भरवशावर सुरू आहे. त्यामुळे कामे रेंगाळली असून नगर परिषदेत एखाद्या कार्यक्रमासाठी आलेल्या सर्वसामान्य नागरिकाला ताटकळत राहिल्याशिवाय पर्याय नाही.

कामठी पालिका : सहा महिन्यांपासून मुख्याधिकारी नाही
बंडू नारनवरे￭ कामठी
नगर परिषदेचा कार्यभार सध्या प्रभारी अधिकार्‍यांच्या भरवशावर सुरू आहे. त्यामुळे कामे रेंगाळली असून नगर परिषदेत एखाद्या कार्यक्रमासाठी आलेल्या सर्वसामान्य नागरिकाला ताटकळत राहिल्याशिवाय पर्याय नाही. एका अधिकार्‍याकडे तीन-तीन पदाचा प्रभार आहे. त्यामुळे त्यांनाही मानसिक त्रास सहन करावा लागत आहे. विशेष म्हणजे, नगर परिषदेचा कार्यभार मुख्याधिकार्‍यांकडून चालविला जात असताना गेल्या सहा महिन्यांपासून स्थायी मुख्याधिकारी नाही.
कामठी नगर परिषदेचे मुख्याधिकारी रवींद्र पांढरे यांची यवतमाळ येथे बदली झाल्यानंतर या पदाचा प्रभार कळमेश्‍वरच्या मुख्याधिकारी माधुरी मडावी यांच्याकडे देण्यात आला. मात्र काही दिवसांतच त्यांच्याकडून हा प्रभार काढून नायब तहसीलदार संजय रामटेके यांच्याकडे अतिरिक्त कार्यभार देण्यात आला. काही दिवस त्यांच्याकडे हा पदभार ठेवल्यानंतर उमरेडचे मुख्याधिकारी देशमुख यांच्याकडे काही दिवसापूर्वी अतिरिक्त कार्यभार देण्यात आला. देशमुख यांच्याकडे आता उमरेडसोबतच कामठी आणि जिल्हा प्रकल्प अधिकारी अशा तीन पदाची जबाबदारी आहे. त्यामुळे ते एकाही विभागाला बरोबर न्याय देऊ शकत नसल्याचा आरोप केला जात आहे.
नोव्हेंबर २0१३ ला स्थायी मुख्याधिकारी पांढरे यांची बदली झाल्यानंतर गेल्या सहा महिन्यांपासून स्थायी मुख्याधिकारी न मिळणे हे या नगर परिषदेचे दुर्दैवच म्हणावे लागेल. प्रभारी मुख्याधिकार्‍यांपैकी केवळ माधुरी मडावी यांनी पालिकेचा कार्यभार सांभाळण्याचा प्रयत्न केला.
मुख्याधिकार्‍यांसोबतच नगर परिषदेतील मुख्य लिपिक धानफुले यांच्याकडे कर विभाग प्रमुख व न्यायालयीन प्रकरण असे तीन कार्यभार देण्यात आले आहे. गाडकिले यांच्याकडे अंतर्गत लेखा परीक्षक व लेखापाल असे दोन कार्यभार सोपविण्यात आले आहे. बलराज नामपल्लीवार यांच्याकडे सभा लिपिकसोबतच कॅशियरचासुद्धा भार आहे. विद्युत निरीक्षक खाडे हे ३0 एप्रिलला सेवानवृत्त झाले असून त्यांचा हा कार्यभार आणखी कुणाकडे अतिरिक्त कार्यभार म्हणून देण्यात येईल, याबाबत अजून निश्‍चित केले नाही.
एकापेक्षा अधिक कार्यभार असल्याचा ताण येथील कर्मचार्‍यांच्या व अधिकार्‍यांच्या चेहर्‍यावर स्पष्टपणे जाणवत आहे. २00६ पासून कामठी नगर परिषदेत एकूण २२ पदे रिक्त असून ती अद्याप भरण्यात आले नाही. येथील कर्मचार्‍यांना वेळेवर नियमितपणे पगार तर देण्यात येत नाही. उलट त्यांच्याकडे दोन-तीन विभागाचा अतिरिक्त कार्यभार सोपवून त्यांचा ताण वाढवत असल्याचा आक्रोश येथील कर्मचार्‍यांमध्ये दिसून येत आहे.