लोकमत न्यूज नेटवर्क
नागपूर : विश्वकर्मा बिगरशेती सहकारी पतसंस्थेत झालेल्या सव्वादोन कोटी रुपयांच्या घोटाळ्यात वित्त गुन्हे शाखेने संस्थेचे व्यवस्थापक व महिला लेखापालास अटक केली आहे. दिगंबर येवले (रा. भोलेबाबा नगर, हुडकेश्वर) तथा स्वर्णा प्रमोद कोकडे हे या प्रकरणातील आरोपी आहेत.
२००५ मध्ये पतसंस्थेची सुरुवात झाली होती. पतसंस्था वेगवेगळ्या योजनांतर्गत जमा राशी स्वीकारणे व कर्ज वितरणाचे कार्य करते. २०१६ ते २०१९ दरम्यान जवळपास सव्वा दोन कोटी रुपयाचा भ्रष्टाचार झाला होता. नियमांकडे दुर्लक्ष करून वेगवेगळ्या मार्गाने कर्ज वितरित करण्यात आले होते. पतसंस्थेत घोटाळा झाल्याची तक्रार मिळाल्यावर लेखापरीक्षक पुंडलिक पालांदूरकर यांनी लेखापरीक्षण केले. त्यात सव्वा दोन कोटी रुपयांचा घोटाळा उघडकीस आला. त्याच आधारावर वाठोडा पोलीस ठाण्यात फसवणूक व महाराष्ट्र गुंतवणूकदार हित संरक्षण अधिनियम (एमपीआयडी) अंतर्गत प्रकरणाची नोंद करण्यात आली. १५ जानेवारीला प्रकरणाचा तपास वित्त गुन्हे शाखेकडे सोपविण्यात आला. वित्त शाखेने ३० जानेवारीला यात पुरुषोत्तम तुळशीदास बेले (४९, रा. सर्वश्रीनगर), नरेश तुळशीराम दांडेकर (४७, रा. शारदा चौक, अयोध्यानगर) व वासुदेव विठोबाजी हिरूडकर (४८, रा. आनंदनगर, सक्करदरा) यांना अटक केली. गुरुवारपासून ते पोलिसांच्या तावडीत आहेत. तपासाच्या अनुषंगाने आज सकाळी दिगंबर येवले व स्वर्णा कोकडे यांना अटक करण्यात आली. त्यांना ६ फेब्रवारीपर्यंत ताब्यात घेण्यात आले आहे. येवलेचे हुडकेश्वर येथे मोठे घर आहे. पोलीस त्याच्या उत्पन्नाचा तपास करत आहेत. वित्त शाखेचे डीसीपी विवेक मसाळ यांनी पतसंस्थेकडून झालेल्या फसवणुकीला बळी पडणाऱ्या नागरिकांनी तक्रार करण्याचे आवाहन केले आहे.
.........