नागपूर : जैश ए मोहम्मद ने नागपूर सोबतच दिल्लीतही रेकी करून घेतल्याची खळबळजनक माहिती पुढे आली आहे. जैश चे हस्तक आणि रईसचे चार साथीदार पुन्हा काश्मीर मध्ये पकडले गेले. त्यांच्याकडून ही माहिती उघड झाल्याचे शिर्षस्थ सूत्रांनी लोकमतला सांगितले आहे. दरम्यान, येथील संघ मुख्यालयासह विविध संवेदनशील स्थळांच्या रेकी प्रकरणात जैश ए मोहम्मदच्या हस्तकाला जो बंदा मदत करणार होता, तो तपास यंत्रणेच्या टप्प्यात असून त्याच्या मुसक्या कोणत्याही क्षणी आवळल्या जाऊ शकतात, अशीही माहिती शिर्षस्थ सूत्रांकडून मिळाली आहे.
आत्मघाती हल्ल्याच्या इराद्याने जैश ए मोहम्मदचा ऑपरेशन कमांडर उमर याने पाकिस्तानात बसून त्याच्या हस्तकाला नागपुरात पाठविले होते. रईस अहमद असाद उल्ला शेख (२६, अवंतीपुरा, काश्मीर) नामक या हस्तकाकडून उमरने संघ मुख्यालयासह विविध संवेदनशील स्थळाची रेकी करून घेतली. तत्पूर्वी 'नागपुरात पोहोचल्या बरोबर तुला एक 'बंदा' भेटेल आणि तो सगळ्या प्रकारची मदत करेल', असे उमरने रईसला सांगितले होते. 'हा बंदा कोण आहे, नागपूरचा की नागपूरच्या बाहेरचा', ते अद्याप स्पष्ट झाले नाही. मात्र, तपास यंत्रणा त्याचा कसून शोध घेत आहेत. त्यातून 'बंदा' अधोरेखित झाल्याची खास सूत्रांची माहिती आहे. हा बंदा टेक्नोसॅव्ही अन कमालीचा अलर्ट असून त्याच्याकडे अनेक सीम असावे, असाही अंदाज आहे. तो कितीही धूर्त असला तरी त्याचा लवकरच छडा लावला जाईल, असा सूत्रांचा दावा आहे. दरम्यान, जैश ने एकीकडे नागपुरात तर दुसरीकडे दिल्लीतही अनेक संवेदनशील स्थळांची रेकी केली आहे. रईसच्या चौकशीनंतर जैशचे पुन्हा चार हस्तक काश्मीरमध्ये पकडण्यात आले. त्यांच्याकडून हा खळबळजनक खुलासा झाल्याचे खास सूत्रांनी लोकमतला सांगितले आहे. परिणामी तपास यंत्रणा आता आणखीच जास्त सक्रिय झाल्या आहेत.
पन्नासेक जणांची चौकशी
स्थानिक अधिकाऱ्यांनी श्रीनगरला जाऊन रईसची चौकशी केल्यानंतर स्थानिक पोलिस तसेच एटीएसने आजवर 'रईस' च्या संपर्कात आलेल्या पन्नासेक जणांची चौकशी केली आहे. ज्या हॉटेल मध्ये तो थांबला होता, त्या हॉटेलच्या चालक, मालक, वेटर, कर्मचारी, ज्या मशिदीत गेला होता, जिथून त्याने ताविज घेतला, त्यांनाही विचारपूस करण्यात आली आहे. रईसने ज्या ज्या वाहनांचा नागपुरात वापर केला, ती सर्व वाहने शोधून पोलिसांनी वाहनचालकांनाही प्रदीर्घ विचारपूस केली आहे. या सर्व चौकशीतून येथे रईसला कुणीही मदत केली नसल्याचा निष्कर्ष पोलिसांनी आतापर्यंतच्या चौकशीतून काढला, असे पोलिस आयुक्त अमितेशकुमार यांनी आज पत्रकारांना सांगितले.
चौकशी प्रदीर्घ चालणार
नागपूर सोबतच दिल्लीतही रेकी करण्यात आल्याचे आता स्पष्ट झाल्याने हे प्रकरण अत्यंत गँभीर बनले आहे. त्यामुळे या प्रकरणाची चौकशी आणखी अनेक दिवस सुरू राहणार आहे. स्थानिक पोलिस, दिल्ली पोलीस एटीएस, एनआयए तसेच गुप्तचर संस्था एकमेकांशी समन्वय ठेवून रेकी प्रकरणाचा तपास करीत आहेत