लोकमत न्यूज नेटवर्क
नागपूर : दहावी व बारावीची परीक्षा देणाऱ्या विद्यार्थ्यांना परीक्षाविषयक अडचणींचे थेट व तात्काळ निराकरण व्हावे, यासाठी जिल्हा परिषदेच्या शिक्षण विभागाने ‘शाईन ॲप’ची निर्मिती केली आहे. गुरुवारी या ॲपचे उद्घाटन जिल्हाधिकारी रवींद्र ठाकरे व निवासी उपजिल्हाधिकारी रवींद्र खजांची यांच्या हस्ते करण्यात आले. हे ॲप एनआयसीद्वारे विकसित करण्यात आले आहे. या ॲपची मदत घेण्याचे आवाहन जिल्हाधिकारी रवींद्र ठाकरे यांनी केले आहे.
‘स्टुंडट हेल्पलाईन इन एक्झाम’ या संकल्पनेतील आद्याक्षरे घेऊन हे ॲप तयार करण्यात आले. ‘शाईन इन एक्झाम’ या नावाने गुगल ॲप स्टोअरवर हे ॲप उपलब्ध आहे. या ॲपद्वारे येणाऱ्या दहावी व बारावीच्या परीक्षेबाबत असणाऱ्या शंका विद्यार्थी विचारू शकतील. हे ॲप मराठी व इंग्रजी या भाषेमध्ये उपलब्ध आहे. या ॲपमध्ये परीक्षाचे वेळापत्रक, वारंवार विचारले जाणारे प्रश्न महत्त्वाचे संकेत स्थळ, अद्ययावत बातम्या, विद्यार्थ्यांसाठी मार्गदर्शक सूचना आदींचा समावेश असणार आहे. या ॲपला गुगल ॲप स्टोरमधून डाऊनलोड करता येईल. यासाठी विद्यार्थ्याने त्यांचे नाव मोबाईल क्रमांक, इयत्ता व शाळेचे नाव आदी माहिती ॲपमध्ये भरावयाची आहे.
विद्यार्थ्यांनी एकदा ॲपवरून सर्व सूचना व माहिती वाचून घ्यावी. त्यानंतर अडचण आल्यास ॲपवरूनच तज्ज्ञांद्वारे शंकानिरसन करण्यात येईल.