गुंडाला नाकारला अटकपूर्व जामीन

अंबाझरी पोलीस ठाण्याच्या हद्दीतील पांढराबोडी बौद्धविहारानजीक आयोजित दहीहांडीच्या कार्यक्रमात दंगा करून काहींना जखमी करणाऱ्या एका कुख्यात गुंडाचा ...

दहीहांडी कार्यक्रमात दंगा प्रकरण नागपूर : अंबाझरी पोलीस ठाण्याच्या हद्दीतील पांढराबोडी बौद्धविहारानजीक आयोजित दहीहांडीच्या कार्यक्रमात दंगा करून काहींना जखमी करणाऱ्या एका कुख्यात गुंडाचा अटकपूर्व जामीन अर्ज अतिरिक्त सत्र न्यायाधीश विजयकुमार शुक्ला यांच्या न्यायालयाने फेटाळून लावला. सेवक तुलाराम मसराम (३७), असे आरोपीचे नाव असून तो धरमपेठ खरे टाऊन येथील रहिवासी आहे. या प्रकरणाची माहिती अशी, ११ सप्टेंबर २०१५ रोजी पांढराबोडी येथील प्रज्ञान इंगोले याच्या घराजवळ दहीहांडीचा कार्यक्रम आयोजित करण्यात आला होता. या कार्यक्रमात या प्रकरणातील फिर्यादी संजय कुंदई बनोदे आणि त्याचे सहकारी डीजेच्या तालावर नाचत होते. त्याच वेळी सेवक मसराम हा आपले आठ-दहा साथीदार घेऊन आला होता. त्यांच्याजवळ तलवारी होत्या. जुन्या भांडणाचा सूड म्हणून त्यांनी तलवारीने हल्ला केला होता. त्यात बनोदे हे गंभीररीत्या जखमी झाले. बनोदे यांच्या तक्रारीवरून अंबाझरी पोलिसांनी भादंविच्या ३०७, ३२४, १४३, १४४, १४७, १४८, १४९ अन्वये गुन्हा दाखल केला होता. या प्रकरणात एकूण सात आरोपींना जामीन मिळालेल्या आहे. सेवक याच्यासह अन्य ४ आरोपी फरार आहेत. सेवक हा कुख्यात गुन्हेगार असून त्याच्याविरुद्ध सीताबर्डी आणि अंबाझरी पोलीस ठाण्यात गुन्हे दाखल आहे.सेवक मसराम याने अटक टाळण्यासाठी न्यायालयात अटकपूर्व जामीन अर्ज दाखल केला होता. प्रकरण गंभीर असल्याने आरोपीचा अटकपूर्व जामीन अर्ज फेटाळण्यात आला. न्यायालयात सरकार पक्षाच्या वतीने अतिरिक्त सरकारी वकील विलास राऊत यांनी काम पाहिले. (प्रतिनिधी)