भुसावळ विभागातील लोकोपायलटला परत बोलवा

सहा महिन्यासाठी भुसावळला पाठविलेले लोकोपायलट दोन वर्ष होऊनही परतले नाहीत. यामुळे नागपूर विभागात २५० लोकोपायलटची पदे रिक्त झाली असून कार्यरत लोकोपायलटवर कामाचा ताण वाढला आहे.

नागपूर : सहा महिन्यासाठी भुसावळला पाठविलेले लोकोपायलट दोन वर्ष होऊनही परतले नाहीत. यामुळे नागपूर विभागात २५० लोकोपायलटची पदे रिक्त झाली असून कार्यरत लोकोपायलटवर कामाचा ताण वाढला आहे. त्यामुळे बाहेर पाठविलेले लोकोपायलट त्वरित परत बोलवावे या आणि इतर मागण्यांसाठी सेंट्रल रेल्वे मजदूर संघातर्फे गार्ड आणि लोकोपायलट लॉबीसमोर एक दिवसीय उपोषण आंदोलन करण्यात आले. मध्य रेल्वेच्या नागपूर विभागातील १२७ लोकोपायलट जून २०१२ मध्ये ६ महिन्यांसाठी भुसावळ विभागात पाठविले. परंतु एप्रिल २०१४ पर्यंत हे लोकोपायलट भुसावळ विभागाने परत केले नाहीत. नागपूर विभागात २५० लोकोपायलटची पदे रिक्त होऊन कार्यरत लोकोपायलटवर कामाचा ताण वाढला. त्यांना सुट्या मिळणे बंद होऊन ओव्हरटाईम करण्याची पाळी आली आहे. यामुळे सुरक्षेवर प्रश्नचिन्ह लागले आहे. याशिवाय आमला छिंदवाडा हा सेक्शन मध्य रेल्वेचा आहे. तेथे दक्षिण पूर्व मध्य रेल्वे आमला-छिंदवाडा-आमला ही गाडी चालविते. या मोबदल्यात गोंदिया-मुंबई विदर्भ एक्स्प्रेस आणि गोंदिया-कोल्हापूर महाराष्ट्र एक्स्प्रेस या दोन गाड्या दक्षिण पूर्व मध्य रेल्वेने मध्य रेल्वेला देण्याचे मान्य केले होते. परंतु या दोन गाड्या दिल्या नसल्यामुळे आमला-छिंदवाडा-आमला ही गाडी मध्य रेल्वेच्या ताब्यात द्यावी, ही मागणी आंदोलनात करण्यात आली. याशिवाय नरखेड-अमरावती-नरखेड हा ९० किलोमीटरचा मार्ग मध्य रेल्वेच्या तर ३० किलोमीटरचा मार्ग भुसावळ रेल्वेच्या अखत्यारीत आहे. परंतु नरखेड-अमरावती ही गाडी भुसावळ विभाग चालवितो. त्यामुळे या गाडीच्या चार फेर्‍या नागपूर विभागाला आणि एक फेरी भुसावळ विभागाला देण्याची मागणी यावेळी करण्यात आली. नागपूर विभागात गार्डची एकून ५६० मंजूर पदे असून त्यातील ११० पदे रिक्त आहेत. त्यामुळे गार्डला सुट्या मिळत नसून त्यांनाही लोकोपायलटप्रमाणे ओव्हरटाईम करावा लागत आहे. त्यामुळे गार्डची रिक्त पदे त्वरित भरण्याचा मुद्दा आंदोलनात रेटून धरण्यात आला. आंदोलनातील मागण्यांवर १५ दिवसात उपाययोजना न केल्यास निर्णायक आंदोलन करण्याचा इशारा यावेळी देण्यात आला. आंदोलनात सेंट्रल रेल्वे मजदूर संघाचे विभाग अध्यक्ष आर. एन. चांदुरकर, विभागीय सचिव विनोद चतुर्वेदी, विभाग संघटक देबाशीष भट्टाचार्य, शाखा सचिव वीरेंद्र सिंग यांच्या नेतृत्वात असंख्य लोकोपायलट उपोषणावर बसले होते. (प्रतिनिधी)