पोटाला चिमटा घेत यशाची उत्तुंग भरारी

माणसाचे पोट भरले तरच स्वप्नही पाहता येतात. गरीबीमुळे अनेकांच्या आयुष्यात भूक भागविण्याचा संघर्षच आयुष्य व्यापून उरतो.

सिमरन वासनिक : पुढच्या शिक्षणासाठी हवाय आधारनागपूर : माणसाचे पोट भरले तरच स्वप्नही पाहता येतात. गरीबीमुळे अनेकांच्या आयुष्यात भूक भागविण्याचा संघर्षच आयुष्य व्यापून उरतो. पण पोटाला चिमटा मारुन आपली इच्छा पूर्ण करण्यासाठी धडपडणारे लोक दुर्मिळच असतात. दोन वेळच्या पोटभर भोजनासाठी शिक्षणाशिवाय तरणोपाय नाही, हे ओळखलेल्या सिमरनने भूक विसरून दहावीच्या परीक्षेत ९३ टक्के गूण मिळवित यश खेचून आणले. मानसिक, भावनिक आणि शारीरिक अशा तीनही संघर्षाला तिला सामोरे जावे लागले. पण तिने जिद्द हारली नाही. लहान असतानाच अचानक वडील सोडून गेले. कसाबसा चालणारा संसार उघड्यावर आला. पोटच्या गोळ्यांना आई उपाशी कशी ठेवणार? चार घरी स्वयंपाकाचे काम करून आईने दोन मुलींसह किरायाच्या घरात परिस्थितीशी दोन हात केले. मिळेल ते घरगुती काम करुन सध्या दोन वेळेची भूक भागविण्याइतपतच ती कमावते. कुणाचाही आर्थिक आधार नाही. स्वप्न पूर्ण करण्याची जिद्द असली तर प्रतिकुलतेतून त्याचे मार्गही सापडतात. परिस्थितीपुढे शरण होणे सोपे असते पण परिस्थितीशी संघर्ष करताना स्वप्नांच्या मागे धावण्याचे ध्येयवेड असले तर परिस्थितीलाही शरण आणता येते. सिमनरने हे करून दाखविले आहे. पाचपावली येथील एस.सी.एस. गर्ल्स हायस्कूलची विद्यार्थिनी असलेली सिमरन बालपणापासूनच अभ्यासात हुशार. खडतर परिस्थितीतही तिच्या आईने कुणापुढे लाचारी स्वीकारली नाही. आर्थिक अडचणीमुळे मुलींच्या काही गरजा पूर्ण करता आल्या नाही. सिमरनने तक्रार न करता त्यातून मार्ग काढला. अभ्यास करताना पुस्तके विकत घेण्याचीही ताकद नव्हती. त्यामुळे मैत्रिणींची पुस्तके वापरली. आईच्या कष्टाची जाणीव ठेवून, तडजोड करीत, कधीही कुरबुर न करता तिने अभ्यास केला. सिमरन पहिल्या वर्गापासून शाळेतून प्रथम येत आहे. त्यामुळे शाळेकडून तिला चांगले सहकार्य मिळाले. घरची परिस्थिती लक्षात घेऊन इंजिनिअर फोरमने तिला नि:शुल्क कोचिंग दिली. नियमित आणि सातत्याने अभ्यास करून तिने ९३ टक्के गुण मिळविले. पुढे तिला आयएएस करून प्रशासकीय सेवेत जाण्याची इच्छा आहे. मात्र तिच्या शिक्षणाचा खर्च आईच्या अवाक्याबाहेर आहे. मुलीला शिकवायचे आहे पण पैसा आणायचा कुठून....या विचारानेच त्या माउलीच्या डोळ्याच्या कडा पाणावल्या आहेत. सिमरन हुशार आहे पण तिचे स्वप्न पूर्ण होण्यासाठी हवीय थोडीशी मदत. शिक्षणसाठी तिला समाजातून आधार मिळाला तरच ही गुणवंत सिमरन शिक्षण पूर्ण करु शकेल आणि समाजासाठी सेवा देऊ शकेल. (प्रतिनिधी)