नागपूर : जिल्ह्यातील ग्रामीण भागात १४ डिसेंबरपासून शाळांना सुरुवात झाली, तर महापालिकेच्या हद्दीतील शाळा ४ जानेवारीपासून सुरू झाल्या. जिल्ह्यात ९ वी ते १२ वी वर्गातील २,७०,५८३ विद्यार्थी आहेत. शाळा भेट अहवालात आजच्या घडीला ५५,७१० विद्यार्थी शाळेत नियमित उपस्थित राहात आहेत. महापालिकेच्या हद्दीतील सुरू झालेल्या शाळांमध्ये दुसऱ्या दिवशी ८०० विद्यार्थी वाढले.
जिल्ह्याच्या ग्रामीण भागात जिल्हाधिकाऱ्यांनी कोरोनाच्या मार्गदर्शक सूचनांचे पालन करीत १४ डिसेंबरपासून शाळा सुरू केल्या. ग्रामीण भागात ९ ते १२ वीच्या ६४८ शाळा आहेत. यात १,२८,९५५ विद्यार्थी प्रवेशित आहे. यापैकी ४०,८२२ विद्यार्थी नियमित शाळेत उपस्थित राहात आहेत, तर महापालिकेच्या हद्दीतील ५६३ शाळा सुरू झाल्या आहे. या शाळेत १,४१,६२८ विद्यार्थी आहे. दुसऱ्या दिवशी शहरातील शाळेत १४,८८८ विद्यार्थ्यांची नोंद झाली. शहरातील शाळेच्या शिक्षक व शिक्षकेतर कर्मचाऱ्यांना कोरोनाची चाचणी करण्याचे प्रशासनाने निर्देश दिले होते. आतापर्यंत ६८ शिक्षक व शिक्षकेतर कर्मचाऱ्यांचा अहवाल पॉझिटिव्ह आला आहे. ग्रामीण भागातील शाळा सुरू होऊन २० दिवसांचा कालावधी लोटला आहे. दरम्यानच्या काळात कुठल्याही विद्यार्थ्याला कोरोनाची लागण झालेली नाही. उलट ग्रामीण भागात दिवसेंदिवस विद्यार्थ्यांची संख्या वाढतच आहे. ग्रामीण भागातून कोरोनाची भीती काहीशी कमी होत आहे. ग्रामीण भागातील विद्यार्थी संख्येला प्रवासी व्यवस्थाही कारणीभूत आहे. ग्रामीण भागात नियमित बसेस सुरू झाल्या नाहीत. शहरातील शाळेतसुद्धा विद्यार्थी संख्या वाढेल, अशी अपेक्षा शिक्षकांना आहे.