फर्टिलायझर कंपनीत बुरखाधाऱ्यांचा सशस्त्र दरोडा

फर्टिलायझर कंपनीच्या चौकीदाराला सहा बुरखाधारी दरोडेखोरांनी चाकुच्या धाकावर खोलीत डांबून ठेवले व ७५ हजार रुपयांचा ऐवज लुटून नेला.

नांदगाव पेठ पोलीस ठाण्यासमोरील घटना : चाकुचा धाक दाखवून चौकीदाराला डांबले
श्‍वान व ठसेतज्ज्ञ पथक रित्या हाताने परतले
अमरावती : फर्टिलायझर कंपनीच्या चौकीदाराला सहा बुरखाधारी दरोडेखोरांनी चाकुच्या धाकावर खोलीत डांबून ठेवले व ७५ हजार रुपयांचा ऐवज लुटून नेला. नांदगाव पेठ पोलीस ठाण्यासमोरील संजय खोडके यांच्या मालकीच्या अंबा फर्टिलायझर कंपनीत गुरुवारी मध्यरात्री १.३0 वाजता ही खळबळजनक घटना घडली. वासुदेव नारायण जवंजाळ (६५, रा. कठोरा गांधी) असे डांबून ठेवलेल्या चौकीदाराचे नाव आहे.
संजय खोडके यांची नांदगाव पेठ पोलीस ठाण्यासमोर रासायनिक खतांची कंपनी आहे. गेल्या आठ महिन्यांपासून हा कारखाना बंद आहे. याठिकाणी वासुदेव जवंजाळ व पंजाबराव जयराम कांबळे (६२, रा. नांदगाव पेठ) हे दोन सुरक्षा रक्षक आहेत.
घटनेच्या दिवशी वासुदेव जवंजाळ कारखान्यात होते. मध्यरात्री १.३0 वाजताच्या दरम्यान सहा बुरखाधारी दरोडेखोरांनी एक्स्प्रेस हायवे मार्गाने कंपनीत प्रवेश केला. दरोडेखोर ३५ ते ४0 वयोगटातील होते. दोघांनी चाकुचा धाक दाखवून वासुदेव जवंजाळ यांना खोलीत डांबून ठेवले. उर्वरित दरोडेखोरांनी कंपनीच्या बाहेर लावलेल्या ट्रान्सफार्मरचे तार तोडून शंभर किलो तांबा तार व शंभर लिटर ऑईल असा एकूण ७५ हजार रुपयांचा माल चोरुन पहाटे ३ वाजता घटनास्थळावरुन पळ काढला. (प्रतिनिधी)
अडीच तास ठेवले डांबून
दरोडेखोरांनी चौकीदार वासुदेव जवंजाळ यांना अडीच तास डांबून ठेवले. दरोडेखोर पळून जाताच घाबरलेले वासुदेव हे नांदगाव पेठ येथील बस थांब्याजवळ आले. त्यांनी या घटनेची माहिती एका व्यक्तीच्या भ्रमणध्वनीवरुन त्यांचे सहकारी पंजाबराव कांबळे यांना दिली. त्यानंतर पोलिसांना सूचना दिली. पोलीस उपायुक्त सोमनाथ घार्गे, सहायक पोलीस आयुक्त साखरकर, गुन्हे अन्वेषण शाखेचे पोलीस निरीक्षक प्रमेश आत्राम, नांदगाव पेठचे पोलीस निरीक्षक लटपटे, महेश ठाकूर यांनी घटनास्थळी धाव घेतली.
￭ रासायनिक कारखान्यात दरोडा घातल्याची माहिती मिळताच वरिष्ठ पोलीस अधिकार्‍यांसह कर्मचार्‍यांनी घटनास्थळाला भेट दिली. श्‍वानपथक व ठसे तज्ज्ञांना पाचारण करण्यात आले. परंतु नुकताच पाऊस येऊन गेल्याने श्‍वान पथक भरकटले. त्यामुळे दोन्ही पथक रिक्त हस्ते परतले. ग्रामीण पोलिसांनी पकडली होती ट्रान्सफॉर्मर फोडणारी टोळी
￭ शहरासह जिल्ह्यात अँम्बुलन्सचा वापर करुन ट्रान्सफॉर्मर फोडणार्‍या टोळीचा काही महिन्यांपूर्वी ग्रामीण गुन्हे शाखेच्या पथकाने पर्दाफाश केला होता. दोन भंगारवाल्यांसह यवतमाळ व नेर येथील प्रत्येकी तीन आरोपींना अटक केली होती. त्यांच्याकडून पोलिसांनी मंगरुळ दस्तगीर पोलीस ठाण्याच्या हद्दीत घडलेल्या गुन्ह्यातील पाऊणे तीन लाख रुपयांचा मालही जप्त केला होता. या टोळीतील काही सदस्य जामिनावर सुटल्याची माहिती पोलीस सूत्रांनी दिली. या टोळीचा या घटनेशी काही संबंध आहे का, याचाही शोध पोलीस घेत आहेत. टोल नाक्यावरील फुटेज तपासले
￭ आर्थिक गुन्हे शाखेचे पोलीस निरीक्षक महेश ठाकूर यांनी नांदगाव पेठ टोल नाक्याला भेट दिली. मध्यरात्री १.३0 ते पहाटे ४ वाजेपर्यत नाक्यावरुन ये-जा करणार्‍या वाहनांचे फुटेज तपासले. परंतु दरोडेखोरांनी दरोड्यासाठी कोणत्या वाहनाचा वापर केला, हे स्पष्ट होऊ शकले नाही.