नागपूर : अनलॉकनंतर परिस्थिती सामान्य होत असून महामेट्रोने कामाची गती वाढविली आहे. धंतोली परिसरातील यशवंत स्टेडियमसमोर २५ मजली पार्किंग आणि व्यावसायिक संकुल उभे राहणार आहे. याकरिता महामेट्रोने निविदा मागविण्याची प्रक्रिया सुरू केली आहे.
व्यावसायिक संकुलाचे काम पूर्ण झाल्यानंतर नागपूरचा चेहरामोहरा बदललेला दिसणार आहे. प्रस्तावित महत्त्वाकांक्षी प्रकल्पाची उंची ८८ मीटर असून इमारत २५ मजली राहील. पीपीपी तत्त्वावर प्रकल्प राबविणार आहे. पुलाच्या (फूट ओव्हर ब्रिज) माध्यमातून हे संकुल सीताबर्डी स्टेशनशी जोडले जाईल. संबंधित कंत्राटदारांना काम पूर्ण करण्याकरिता ४ वर्षांचा अवधी मिळेल. बांधकामाच्या अवधीसह एकूण ६० वर्षांच्या काळाकरिता संकुल भाडेपट्टा तत्त्वावर दिले जाणार आहे. बांधकामाच्या नियमाप्रमाणे बांधकाम करणाऱ्या कंत्राटदाराला चारचाकी, दुचाकी आणि सायकलकरिता पार्किंगची सोय करावी लागेल. याशिवाय संबंधिताला १०० कार आणि १०० दुचाकी वाहनांकरिता पार्किंग सुविधादेखील करावी लागणार आहे.