अपंगांसाठी विशेष डिग्री कॉलेज

शासनाच्या उच्च व तंत्रशिक्षण विभाग मंत्रालयाने संत गाडगेबाबा अमरावती विद्यापीठात अपंगांसाठी विशेष डिग्री कॉलेज सुरु करण्याच्या निर्णयाला मान्यता दिली आहे.

केंद्र शासनाचा उपक्रम : अपंग जीवन विकास संस्थेकडे जबाबदारी

ंअमरावती : शासनाच्या उच्च व तंत्रशिक्षण विभाग मंत्रालयाने संत गाडगेबाबा अमरावती विद्यापीठात अपंगांसाठी विशेष डिग्री कॉलेज सुरु करण्याच्या निर्णयाला मान्यता दिली आहे. केंद्र शासनाच्या या उपक्रमाला राज्य शासनानेही मंजुरी दिल्याने लवकरच विद्यापीठात अपंगांसाठी डिग्री कॉलेज सुरु केले जाणार आहे.

केंन्द्र शासनाच्या सामाजिक व अधिकारिता मंत्रालय, नवी दिल्ली अंतर्गत रिहाबलेशन काऊंसिल ऑफ इंडियाद्वारे अमरावती येथे अपंगांसाठी डिग्री कॉलेज (मूकबधिर प्रवर्ग) सुरु करण्याला मान्यता मिळाली आहे. केंद्र शासनाच्या आदेशाने संत गाडगेबाबा अमरावती विद्यापीठाच्या बृहत आराखड्यात अपंगांसाठी विशेष बी.एड. कॉलेज सुरु करण्याचा प्रस्ताव शासनाकडे सादर करण्यात आला होता.

त्या अनुषंगाने राज्य शासनाने याला मान्यता दिली आहे. या उपक्रमामुळे अमरावती विभागाच्या शैक्षणिक विकासात भर पडली आहे. हे कॉलेज चालविण्याकरिता स्थानिक अपंग जीवन विकास संस्थेकडे कार्यभार सोपविण्यात आला आहे. ही संस्था अपंगांच्या शैक्षणिक सुविधेकरिता गेल्या २५ वर्षांपासून कार्यरत आहे.

संस्थेद्वारा शहरात मूकबधिर प्रवर्गाचे राजीव गांधी डी.एड. कॉलेज चालविण्यात येत आहे. राज्यात आतापर्यंत मुंबई व पुणे या विद्यापीठात अपंगांसाठी डिग्री कॉलेज सुरु आहे.

अमरावतीमध्येही अपंगांसाठी विशेष कॉलेज सुरु होणार असल्याने आता अपंगांचा शैक्षणिक स्तर उंचावणार आहे. हा अभ्यासक्रम एक वर्षाचा असून यामध्ये फक्त २५ विद्यार्थ्यांना सीईटीद्वारे प्रवेश घेता येणार आहे.

रिहायबलेशन काऊंसिल ऑफ इंडियाच्या निकषानुसार आवश्यक शुल्क भरुन विद्यार्थी प्रवेश घेऊ शकतील. शासनाच्या शर्ती व अटींनुसार एससी, एसटी, व्हीजे,एनटी व ओबीसीच्या विद्यार्थ्यांना शिष्यवृत्ती व इतर शैक्षणिक सुविधांचा लाभ मिळणार आहे. (प्रतिनिधी)