म्हाडा घरांच्या किमतीत कपात

लोकसभेत सपाटून मार खाल्लेल्या काँग्रेस आघाडी सरकारला ५ महिन्यांवर आलेल्या विधानसभेत होणारे पानिपत डोळ्यापुढे दिसू लागल्याने ‘डॅमेज कंट्रोल’साठी प्रयत्न सुरू केले आहेत.

जमीर काझी, मुंबई - लोकसभेत सपाटून मार खाल्लेल्या काँग्रेस आघाडी सरकारला ५ महिन्यांवर आलेल्या विधानसभेत होणारे पानिपत डोळ्यापुढे दिसू लागल्याने ‘डॅमेज कंट्रोल’साठी प्रयत्न सुरू केले आहेत. म्हाडाच्या लॉटरीतील घरांच्या किमती कमी करण्यापासून त्याची सुरुवात केली. नागरिकांचा रोष लक्षात घेऊन तातडीने हा निर्णय घेण्यात आला. मुख्यमंत्री पृथ्वीराज चव्हाण यांनी सूचना केल्यानंतर अधिकार्‍यांनी तत्परतेने बदल केल्याचे सूत्रांकडून स्पष्ट करण्यात आले. मुंबई व कोकण मंडळाच्या २६४१ घरांसाठी पूर्वी जाहीर केलेल्या दरामध्ये सरासरी १ ते ४ लाख कमी करण्याचा महत्त्वपूर्ण निर्णय घेण्यात आला आहे. वास्तविक लोकसभा निवडणुकीमध्ये फायदा व्हावा, या हेतूने या वर्षी आचारसंहिता लागू होण्यापूर्वी म्हाडाच्या घराच्या लॉटरीसाठी जाहिरात प्रसिद्ध करण्यात आली होती. मात्र त्याबाबत आक्षेप आल्यानंतर आयोगाने त्याची प्रक्रिया निवडणूक निकालानंतर सुरू करण्याचे आदेश म्हाडाला दिले. लोकसभेत मुंबई, कोकणातील सर्व जागांवर धुव्वा उडण्याबरोबरच ४८ पैकी केवळ ६ जागा मिळाल्याने सरकारच्या कारभाराबाबतची नाराजी प्रकट झाली. त्यामुळे म्हाडाच्या घरांच्या किमती खासगी बाजाराच्या बरोबरीने ठेवण्यात आल्याने लॉटरीला या वेळी थंडा प्रतिसाद मिळत होता. नागरिकांतील हा असंतोष विधानसभेवेळी आणखी उफाळून येण्याची शक्यता वर्तविण्यात येऊ लागल्याने गृहनिर्माण विभाग स्वत:कडे असलेल्या मुख्यमंत्र्यांनी गेल्या आठ दिवसांपूर्वी म्हाडाचे उपाध्यक्ष सतीश गवई यांना बोलावून घेतले. कोणत्याही परिस्थितीमध्ये घरांचे दर कमी करावे, त्यासाठी पर्यायी मार्ग शोधण्याची सूचना केली. त्यांनी मुंबई व कोकण मंडळांतील अधिकार्‍यांशी चर्चा केल्यानंतर म्हाडाच्या या गृहप्रकल्पावर झालेल्या खर्चातील ‘इंटरेस्ट कॅपिटन्स’चे प्रमाण ४ टक्क्यांनी कमी झाल्यास उत्पन्न गटनिहाय सरासरी १ ते ४ लाखांपर्यंत किंमत कमी करता येणे शक्य असल्याचे स्पष्ट झाले. त्यानुसार ही टक्केवारी १४.५ वरून १०.५ पर्यंत खाली आणण्याबाबतचा प्रस्ताव म्हाडा प्राधिकरणाच्या बुधवारी झालेल्या बैठकीमध्ये मांडून त्याला मंजुरी घेण्यात आली. मुंबई व कोकण मंडळांच्या अत्यल्प, अल्प, मध्यम व उच्च उत्पन्न गटामधील घरांच्या किमतीचे प्रमाण निश्चित केल्यानंतर मंगळवारी वरिष्ठ अधिकार्‍यांनी मुख्यमंत्र्यांसमोर सादर करून त्याला मंजुरी मिळविली. त्यानंतर बुधवारी लॉटरीचे बदललेले दर व कार्यक्रम जाहीर करण्यात आल्याचे अधिकार्‍याने स्पष्ट केले. (प्रतिनिधी)