होऊ दे चर्चा...

‘लक्ष्मी’ मंदिराजवळील अलिशान ‘लोटस्’ महालात नितीनबापू नागपूरकर महाराजांचा दरबार भरलेला. कैक नेते आपापला हात दाखवायला रांगेत उभारलेले. ‘भगव्या’ चोचीचा ‘हिरवा’ पोपट एकेक पत्ते ओपन करू लागलेला.

लक्ष्मीदर्शनाचा प्रसाद.... वहाण पीडा योग !(स्थळ : ‘लक्ष्मी’ मंदिराजवळील अलिशान ‘लोटस्’ महालात नितीनबापू नागपूरकर महाराजांचा दरबार भरलेला. कैक नेते आपापला हात दाखवायला रांगेत उभारलेले. ‘भगव्या’ चोचीचा ‘हिरवा’ पोपट एकेक पत्ते ओपन करू लागलेला.) उद्धो : (मनगटावरचं शिवबंधन मागं सरकवत) महाराजऽऽ माझ्या हातावरच्या रेषा काय म्हणतात? ‘राजयोग’ आहे की नाही?महाराज : (गोबऱ्या-गोबऱ्या गालावरच्या नाजूक खळीत इवलीशी मिशी वक्र करत) अरेऽऽरेऽऽ.. तुमच्या कुंडलीत ‘मोदींचा गुरु’ वक्री झाल्यानं आगामी काळात केवळ ‘संघर्षाचा योग’ आहे. उद्धो : (देवेंद्रपंत अन् एकनाथभाऊंकडं रागानं पाहात) मला ‘वक्री गुरु’चं भय नाही; मात्र खालच्या ‘राहू-केतू’च्या लुडबुडीचा राग येतोय. ही बघा माझी नवी कुंडली. कालच बारामतीच्या एका जाणकार ज्योतिषानं तयार करून पाठविलीय. महाराज : (कुंडली पाहून दचकत) आँ? तुमचा ‘सत्तेचा शुक्र’ एकोणीस तारखेनंतर शरद ‘चंद्रा’शी युती करणार असल्याचं कुंडलीत दिसतंय. अशी कशी काय तुमची कुंडली बदलू शकते ?पृथ्वीराज : (डोकं खाजवत) बारामतीचे ज्योतिषबुवा काहीही करू शकतात. ‘सत्तांतर’ अन् ‘पक्षांतर’ यात माहीर असल्यानं ते ‘कुंडल्यांतर’ही करू शकतात.राज : (पानोपानी खाडाखोड केलेल्या ब्लू प्रिंट’ची रद्दी समोर आदळत) महाराजऽऽ ती कुंडली बुडवा उजनी धरणाच्या पाण्यात. अगोदर या रद्दीचं काय करू ते सांगा. महाराज : (डोळे मिचकावत) चिंता नसावी भक्ता. आमचा स्पर्श लाभला तर तुझ्या रद्दीचंही सोनं होईल. फक्त पुढचे सात-आठ दिवस मौन व्रत बाळग... कारण तुझ्या जीभेतली विध्वंसक शक्ती तुलाच मारक ठरू शकतेय.राज : (चरफडत) मग तोपर्यंत काय करू महाराज?महाराज : मराठी व्याकरणाची पुस्तकं वाच. शक्य झालं तर गुजराथी भाषेचाही अभ्यास कर. भविष्यात आमच्याशी ‘सुंसवाद’ साधायला उपयोगी ठरेल. रामदास : (दाढीवरून हात फिरवत नेहमीची ‘ट’ ला ‘ट’वाली कविता म्हणत) तुम्ही ‘लक्ष्मी’पुत्र’तर आम्ही ‘सरस्वती’ची लेकरं..‘राखी’ सोबत असताना, विरोधकांना आणू फेफरं !सदाभाऊ : (‘लक्ष्मी’चं नाव कानावर पडताच लगेच कान टवकारून उत्साहानं) महाराजऽऽ तुम्ही म्हणे ‘लक्ष्मीदर्शन’ देता. मग मला कधी दिसणार?महाराज : (मानभावीपणे हात जोडत) मी तर साधा लक्ष्मीभक्त. मी कोण ‘लक्ष्मीदर्शन’ घडविणारा? मी फक्त ‘लक्ष्मी’च्या आगमनाची जाणीव करून देणारा.उद्धो : (हेटाळणीच्या सुरात) पण गेल्या दोन महिन्यांपासून तुमच्या महालात ‘प्रवेश’ करणारे महाभाग तर ‘लक्ष्मीपुत्र’च आहेत की !महाराज : (तोंडावर बोट ठेवून) भक्तहोऽऽ आता माझ्या मौनव्रताच्या काळाला प्रारंभ होतोय; कारण आजकाल माझा शब्द माझ्यावरच उलटतोय. बहुधा माझेच ग्रह उलटे फिरलेत वाटतं.उद्धो : (खोचकपणे) होय. म्हणूनच की काय , तुमच्या कुंडलीत परवा रात्री पुण्याचा ‘वहाण योग’ होता वाटतं! महाराज : (लगेच सावरून घेत) छे. छे. ‘आपलं वहाण देशभरात गाजलं पाहिजे,’ असं आमच्या ‘सुरत’च्या बड्या महाराजांनी नुकतंच कोल्हापुरात सांगितलं होतं. त्याचाच हा प्रत्यय !- सचिन जवळकोटे