बुलडाणा जिल्ह्यात केबीसीमध्ये ५0 कोटींवर गुंतवणूक

अनेकांचे दणाणले धाबे: एजंटांना अटकेची धास्ती

बुलडाणा : सध्या राज्यभरात घोटाळ्यासाठी गाजत असलेल्या केबीसी नामक खासगी गुंतवणूक कंपनीमध्ये, बुलडाणा जिल्ह्यातील नागरीकांनी सुमारे ४0 ते ५0 कोटी रुपयाची गुंतवणुक केल्याची बाब समोर आली आहे. गुंतवणुकदारांमध्ये प्रामुख्याने डॉक्टर व शिक्षकांसह नोकरदार वर्गाचा भरणा असून, एकीकडे गुंतवणूकदार कमालीचे धास्तावलेअसताना, दुसरीकडे कंपनीच्या एजंटांनाही अटकेच्या भीतीने ग्रासले आहे.
नाशिक येथे स्थापन करण्यात आलेल्या केबीसी या खासगी गुंतवणूक कंपनीने राष्ट्रीयीकृत बँका व गुंतवणूक कंपन्याच्या तुलनेत दामदुप्पट रक्कम देण्याचे आमिष दाखवून, अनेकांना या व्यवसायामध्ये ओढले. सर्वसामान्य गुंतवणूकदाराला एका महिन्यात गुतंवलेल्या रकमेच्या दामदुप्पट रक्कम देण्याचे, तर एजंटांना भरघोस कमिशनचे आमिष दाखविल्यामुळे, अल्पावधीतच बुलडाणा जिल्ह्यात या कंपनीची गुंतवणूक कोट्यावधीच्या घरात गेली.
डॉक्टर, वकील व विशेषत: शिक्षक वर्गाने या कंपनीच्या योजनेत मोठ्या प्रमाणात गुंतवणूक केल्याने सामान्य गुंतवणुकदारांचाही विश्‍वास बसला; मात्र काही काळातच कंपनीने आपला खरा रंग दाखविणे सुरू केले. बुलडाणा जिल्ह्यातील एकट्या देऊळगाव राजा तालुक्यात या कंपनीच्या योजनेत ९ ते १0 कोटी रुपयांची ग्राहकांनी गुंतवणुक झाल्याचे समजते. त्या खालोखाल बुलडाणा तालुक्यात ७ ते ८ कोटींची, तर मोताळा तालुक्यात ५ ते ७ कोटींची गुंतवणूक असल्याची माहिती आहे. विशेष म्हणजे देऊळगाव राजा तालुक्यात एका गुंतवणूकदाराची तर तब्बल एक कोटीची गुंतवणुक असल्याची जोरदार चर्चा आहे.
देऊळगाव राजा येथील उपविभागीय पोलिस अधिकारी प्रशांत परदेशी यांनी नागरिकांना पुर्ण चौकशी क रूनच गुंतवणूक करणे गरजेचे असल्याचे सांगुन कुणाची फसवणूक झाली असल्यास, त्याने पोलिसांकडे रितसर तक्रार दिल्यास, कारवाई करुन जनतेला न्याय मिळवून देण्यात येईल, असे सांगीतले.