जुन्या इमारतींचे इलेक्ट्रिक आॅडिट बंधनकारक

गजबलेल्या काळबादेवीसारख्या विभागातील आगीच्या दुर्घटनेतून धडा घेऊन जुन्या व धोकादायक इमारतींना इलेक्ट्रिक आॅडिट दरवर्षी करून घेणे

मुंबई : गजबलेल्या काळबादेवीसारख्या विभागातील आगीच्या दुर्घटनेतून धडा घेऊन जुन्या व धोकादायक इमारतींना इलेक्ट्रिक आॅडिट दरवर्षी करून घेणे बंधनकारक करण्याची शिफारस पालिकेच्या विशेष चौकशी समितीने केली आहे़ यात कुचराई करणाऱ्या इमारतींचा वीजपुरवठा खंडित करण्याची सूचनाही करण्यात आली आहे़पालिकेच्या अहवालानुसार मुंबईतील ५० टक्के जुन्या इमारतींमध्ये आग लागण्यास शॉर्टसर्किट हे प्रमुख कारण असल्याचे उजेडात आले आहे़ दक्षिण मुंबईतील अशा जुन्या इमारती अरुंद व गजबलेल्या भागात असल्याने त्या ठिकाणी मदत यंत्रणा पोहोचण्यासही विलंब होत असतो़ त्यामुळे जुन्या इमारतींच्या सुरक्षेसाठी इलेक्ट्रिक आॅडिट सक्तीचा करण्याचा मार्ग डॉ़ मुखर्जी यांच्या अध्यक्षतेखालील समितीने सुचविला आहे़ दरवर्षी असे आॅडिट करून घेणे बंधनकारक करण्याची शिफारस या समितीने केली आहे़ दक्षिण मुंबईतील काळबादेवी, भुलेश्वर, भेंडी बाजार, डोंगरी या भागांमधील जुन्या इमारतींमध्ये लोंबळकणाऱ्या वायरिंग व सदोष मीटर बॉक्समुळे शॉर्टसर्किटचा धोका वाढतो़ यात सुधारणा न करणाऱ्या ग्राहकांविरोधात भारतीय विद्युत कायद्यांतर्गत वीज कंपन्यांनी कडक कारवाई करू शकतात़ अशा जुन्या इमारतींमध्ये आग प्रतिबंधक उपाययोजनांसाठी अग्निशमन दलाने पर्याय सुचवावेत, अशी सूचना या समितीने केली आहे़ (प्रतिनिधी)