रक्ताचे रिपोर्ट हाताने अन् मोबाइलवर एक्स-रे पद्धत होणार बंद; राज्यातील शासकीय रुग्णालयात पुन्हा उभी राहतेय ऑनलाइन यंत्रणा

स्वतंत्र यंत्रणा उभारून काम

अविनाश कोळी

सांगली : खासगी संस्थेचे काम अचानक बंद झाल्यानंतर राज्यभरातील शासकीय रुग्णालयांतील ऑनलाइन यंत्रणा बंद पडली होती. त्यामुळे गेल्या चार वर्षांपासून रक्तासह सर्व रिपोर्ट हाताने लिहिण्याची व एक्स-रे मोबाइलवर देण्याची कसरत रुग्णालयांना करावी लागत होती. मात्र, राज्याच्या आरोग्य विभागाने आता ऑनलाइन यंत्रणा उभारण्यास सुरुवात केली आहे. येत्या महिन्याभरात राज्यात एकाचवेळी ही यंत्रणा कार्यान्वित होणार असल्याने रुग्णांसह शासकीय रुग्णालयांतील डॉक्टर, कर्मचाऱ्यांना मोठा दिलासा मिळणार आहे.

‘डिजिटल इंडिया’ अंतर्गत महाराष्ट्रातील सर्व शासकीय रुग्णालये व वैद्यकीय महाविद्यालये ऑनलाइन कारभार करत असताना जुलै २०२२ मध्ये एका रात्रीत अचानक संबंधित एजन्सीचे काम बंद करण्याचे आदेश दिले होते. तेव्हापासून गेली चार वर्षे रुग्णालयातील कामकाज ऑफलाइन झाल्याने केसपेपरपासून विविध वैद्यकीय अहवालही हाताने लिहून देण्याची वेळ डॉक्टर व कर्मचाऱ्यांवर आली आहे. आता यातून डॉक्टर व कर्मचाऱ्यांची मुक्तता होणार आहे. राज्यभरात एकाचवेळी ऑनलाइन यंत्रणा उभारण्याची तयारी सुरू झाली आहे. त्यासाठी स्वतंत्र सॉफ्टवेअर रुग्णालयांना देण्यात आले आहे.

स्वतंत्र यंत्रणा उभारून काम

राज्यातील सर्व शासकीय रुग्णालयांमध्ये ऑनलाइन प्रणालीसाठी स्वतंत्र यंत्रणा उभी करण्यात आली आहे. या यंत्रणेमार्फत ऑनलाइन कामकाज हाताळले जाईल. सध्या रुग्णालयांमध्ये यासाठी प्रशिक्षण देण्यात येत आहे.

महिन्याभरात कार्यान्वित होणार यंत्रणा

कर्मचारी, अधिकाऱ्यांचे प्रशिक्षण पूर्ण होताच महिन्याभरात ही प्रणाली कार्यान्वित होण्याची चिन्हे आहेत. स्वतंत्र सॉफ्टवेअरमार्फत रुग्णांचा संपूर्ण डेटा सेव्ह केला जाईल. त्यामुळे कोणताही अहवाल काही मिनिटांमध्येच उपलब्ध होईल.

शासकीय रुग्णालयातील रांगा घटणार

सध्या शासकीय रुग्णालयांमध्ये केसपेपरपासून वैद्यकीय अहवाल तसेच औषधे घेण्यापर्यंत प्रत्येक ठिकाणी रांगा दिसत आहेत. नव्या यंत्रणेत केवळ आधार कार्डचा वापर करून ओपीडीत जाता येणार आहे. त्यामुळे केसपेपरसाठी रांगेत थांबावे लागणार नाही. मिरजेच्या शासकीय रुग्णालयात सध्या ही प्रक्रिया सुरू करण्यात आली आहे.

खासगीकरण टाळले

राज्याच्या आरोग्य विभागाने ऑनलाइनसाठी स्वतंत्र यंत्रणा उभी करताना हे काम खासगी संस्थेला देणे टाळले आहे. यापूर्वीचा खासगीकरणाचा अनुभव चांगला नसल्याने त्यांनी सावध पावले उचलली आहेत.

सध्या येथील शासकीय रुग्णालयात ऑनलाइन प्रणालीसाठी सात कर्मचाऱ्यांची नियुक्ती केली आहे. या कर्मचाऱ्यांचे प्रशिक्षण सुरू आहे. सॉफ्टवेअरमार्फत लवकरच ही प्रणाली कार्यान्वित होईल. डाॅ. रूपेश शिंदे, वैद्यकीय अधीक्षक, मिरज शासकीय रुग्णालय, मिरज