महायुतीचे उमेदवार गोपीचंद पडळकर यांच्या प्रचारार्थ बुधवारी सांगलीतील जत येथे जाहीर सभेचे आयोजन करण्यात आले होते. यावेळी रयत क्रांती संघटनेचे प्रमुख सदाभाऊ खोत (Sadabhau Khot) यांनी राष्ट्रवादी काँग्रेस(शप) प्रमुख शरद पवार (Sharad Pawar) यांच्या संदर्भात केलेल्या विधानावरून राजकीय वर्तुळातून तीव्र प्रतिक्रिया येत आहेत. अजित पवार, संजय राऊत यांच्यासह अनेक नेत्यांनी यावरून संताप व्यक्त केला आहे. यातच आता जयंत पाटील यांनीही सदाभाऊ खोत यांच्यावर पलटवार केला आहे. ते सांगली येथे पत्रकारांशी बोलत होते.डॉग स्कॉड बाळगल्यासारखी ही परिस्थिती - सदाभाऊ यांच्या विधानासंदर्भात बोलताना जयंत पाटील म्हणाले, "अशा पद्धतीचे वक्तव्य करून भारतीय जनता पक्षाने आपला स्तर किती खाली नेला आहे, हे यातून पुन्हा एकदा स्पष्ट झाले आहे. अशी माणसं भारतीय जनता पक्षाने बाळगलेली आहेत. एक डॉग स्क्वाड बाळगल्यासारखी ही परिस्थिती आहे." एवढेच नाही तर, "ज्यांनी हे बाळगले आहे, त्या देवेंद्र फडणवीसांचे तरी याला समर्थन आहे का? याचा देवेंद्र फडणवीसांनी खुलासा करावा," असेही जयंत पाटील यांनी म्हटले आहे.
एकदा त्यांचे प्रमुख नेते आले आणि त्यांनी भटकी आत्मा असे वर्णण केले होते -"राजकारणाची पातळी किती खाली न्यायची, याला काही मर्यादा राहिलेली नाही. एकदा त्यांचे प्रमुख नेते आले आणि त्यांनी भटकी आत्मा असे वर्णण केले होते. आता सदा खोत यांनी अशी जी भाषा वापरली आहे, याचेही प्रायश्चित्त महाराष्ट्रातील जनता ही भारतीय जनता पक्षाला दिल्याशिवाय राहणार नाही," असेही जयंत पाटील यावेळी म्हणाले.