घरी राहूनही अख्ख्या कुटुंबाने केली कोरोनावर मात

लातूर : हरंगुळ (खु.) येथील प्रा. मोहनराव झुंजे-पाटील यांच्या कुटुंबातील आठपैकी सहा सदस्यांना कोरोनाने घेरले होते. मात्र, कुटुंबातील या सर्व सदस्यांनी न डगमगता एकमेकांना धीर देत कोरोनावर यशस्वी मात केली. विशेष म्हणजे, दीड वर्षांच्या सौम्यानेही कोरोनाला हरविले.

झुंजे यांच्या घरातील मनोज झुंजे यांचा अहवाल प्रारंभी पाॅझिटिव्ह आला होता. त्यामुळे घरातील सर्वांचीच तात्काळ चाचणी करण्यात आली. त्यात दोघे वगळता सहा जण पाॅझिटिव्ह आढळले. त्यात दीड वर्षांच्या सौम्याचाही समावेश होता. वेळेत उपचाराला सुरुवात केली. अहवाल आल्यानंतर घरात दोन दिवस भीतीचे वातावरण होते. शांताबाई झुंजे यांना रक्तदाबाचा त्रास असल्यामुळे चार दिवस दवाखान्यात रहावे लागले. उपचारानंतर त्यांच्या प्रकृतीत सुधारणा झाल्याने सहाही जण घरीच डाॅक्टरांच्या देखरेखीखाली राहिले. या कुटुंबाने एकीने कोरोनाशी लढा दिला अन्‌ कोरोनामुक्त झाले.

मला ताप आल्यामुळे चाचणी केली. अहवाल पाॅझिटिव्ह आला. त्यामुळे घरातील सर्वांचीच चाचणी करण्यात आली. घरातील आठ सदस्यांपैकी सहा जण पाॅझिटिव्ह आले. आईला रक्तदाबाचा त्रास होता. त्यामुळे भीती होती. परंतु, योग्यवेळी योग्य उपचार झाल्याने आम्ही कोरोनाच्या संकटातून बाहेर पडलो.

- मनोज झुंजे

घरातील सर्वच कोरोना पाॅझिटिव्ह आल्याने चिंता होती. विशेषत: माझी दीड वर्षांची मुलगी पाॅझिटिव्ह आल्याने चिंतेत भर पडली. परंतु, डाॅक्टरांनी धीर दिला. तिच्यावर बालरोगतज्ज्ञांकडून उपचार केले. घरीच डाॅक्टरांनी सांगितल्याप्रमाणे औषधोपचार घेतल्याने आम्ही सर्वजण बरे झालो.

- सुप्रिया झुंजे