लोकमत न्यूज नेटवर्क
अहमदपूर : शहराचा विस्तार मोठ्या प्रमाणावर वाढला असून, गुन्ह्यांचे प्रमाणही वाढले आहे. हे गुन्हे रोखण्यासाठी नागरी दलित वस्ती व दलित्तेर विकास योजनेच्या निधीतून जिल्हाधिकाऱ्यांनी शहरातील १९ ठिकाणी सीसीटीव्ही बसविण्यास मंजुरी दिली आहे. त्यासाठी २५ लाख ५४ हजार ५८ रुपयांचा निधी मंजूर करण्यात आला आहे. त्यामुळे शहरावर आता सीसीटीव्हीची नजर राहणार आहे.
अहमदपूर शहराचा विस्तार वाढला असून, मागील काही दिवसांपासून चोऱ्यांचे प्रमाणही वाढले होते. तसेच वाहतुकीवर नियंत्रण ठेवण्यासाठी पोलिसांना अडचण येत होती. त्यामुळे जिल्हाधिकारी पृथ्वीराज बी. पी. यांनी नागरी दलित व दलित्तेर विकास योजनेच्या निधीतून पालिकेकडे निधी वर्ग केला. शहरातील उपविभागीय अधिकारी, पोलीस निरीक्षक व पालिकेच्या सूचनेवरून १९ ठिकाणी सीसीटीव्ही लावण्याचे निश्चित झाले आहे. शहरातील चौकात वेगवेगळ्या अँगलचे कॅमेरे बसविण्यास मंजुरी देण्यात आली आहे.
छत्रपती शिवाजी महाराज चौक, महात्मा बसवेश्वर चौक, जाधव पेट्रोल पंप, महात्मा गांधी महाविद्यालयासमोर, संभाजी चौक, निजवंते चौक, भारतरत्न डॉ. बाबासाहेब आंबेडकर पुतळा परिसर, शासकीय विश्रामगृह, भारतरत्न डॉ. बाबासाहेब आंबेडकर चौक, आझाद चौक, फुलारी यांचे दुकान, क्रांती चौक, हनुमान मंदिर, महादेव मंदिर, खाटीक गल्ली, पंचशील नगर, ईदगाह गेट, मौलाना आझाद चौक अशा १९ ठिकाणी सीसीटीव्ही बसविण्यास मंजुरी देण्यात आली आहे. त्यासाठी गुगल मॅप लोकेशनही निश्चित करण्यात आले आहे.
चौकात सीसीटीव्ही कॅमेरे असून, शहरातील वाहतूक व रहदारीवर नियंत्रण केले जाणार आहे. त्यासाठीचे सर्व्हर पोलीस ठाण्यात बसविण्यात येणार आहे. ही प्रक्रिया येत्या काही महिन्यांत पूर्णत्वास येणार आहे. त्यामुळे शहरातील गुन्हेगारीचे प्रमाण घटणार आहे.
गुन्हेगारी, रहदारीवर नियंत्रण...
शहर सीसीटीव्हीच्या नजरेत येणार असल्यामुळे गुन्हेगारी तसेच रहदारीवर नियंत्रण ठेवता येणार आहे. तेथील सर्व फुटेज उपलब्ध होणार असल्याने तपास यंत्रणेलाही याकामी मदत होणार असल्याचे पोलीस निरीक्षक नानासाहेब लाकाळ यांनी सांगितले.
जिल्हाधिकाऱ्यांच्या प्रयत्नातून मंजुरी...
शहराचा विस्तार वाढल्यामुळे व लोकसंख्या वाढल्यामुळे रहदारीसह अनेक प्रश्न निर्माण झाले होते. त्यावर जिल्हाधिकाऱ्यांच्या पुढाकाराने नागरी दलित वस्ती व दलित्तेर विकास योजनेच्या निधी अंतर्गत २५ लाखांची तरतूद करण्यात आली आहे. त्यात सीसीटीव्ही व त्यासाठी असणाऱ्या संलग्न यंत्रणेची निविदा काढण्यात येणार असल्याचे पालिकेचे मुख्याधिकारी त्र्यंबक कांबळे यांनी सांगितले.