कोल्हापूर : कॉंग्रेस - राष्ट्रवादी कॉंग्रेसने शहराच्या विकासकामांसाठी बाराशे कोटींचा निधी आणला; परंतु ही कामे पूर्ण करण्याऐवजी भाजप सरकारच्या काळात तत्कालीन पालकमंत्री चंद्रकांत पाटील यांनी ती बंद पाडण्याचा प्रयत्न केला. काळम्मावाडी थेट पाईपलाईनसारखी महत्त्वाकांक्षी योजना पूर्णच होऊ नये, असा अट्टहास त्यांनी केला, असा घणाघाती आरोप ग्रामविकास मंत्री हसन मुश्रीफ यांनी शनिवारी रात्री केला.
प्रभाग क्रमांक ३३, महालक्ष्मी मंदिर येथील विविध विकासकामांचा प्रारंभ मंत्री मुश्रीफ यांच्या हस्ते पार पडला, त्यावेळी ते बोलत होते. अध्यक्षस्थानी राष्ट्रवादीचे शहराध्यक्ष माजी महापौर आर. के. पोवार होते.
थेट पाईपलाईन योजनेच्या कामात जाणीवपूर्वक अडवणूक केली. ज्या खात्याचे चंद्रकांत पाटील होते, त्या बांधकाम विभागाचा ना-हरकत दाखलाही त्यांनी मिळवून दिला नाही. विजेच्या खांबांचा स्थलांतर, झाडे तोडण्यासाठी ना-हरकत दिली नाही. त्यांना मी स्वत: भेटून आम्ही निधी दिला; तुम्ही कामे पूर्ण करा, अशी विनंती केली. परंतु गेल्या चार वर्षांत योजनाच पूर्ण होऊ नये, असा अट्टहास केला. त्यामुळे भाजपला मते मागण्याचा नैतिक अधिकार राहिलेला नाही, असे मुश्रीफ म्हणाले.
येत्या दिवाळीची कोल्हापूरकरांची पहिली अंघोळ ही काळम्मावाडीच्या पाण्यानेच होईल, असा निर्धार मुश्रीफ यांनी केला. अंबाबाई तीर्थक्षेत्र आराखडा पूर्ण करण्यासह दोन हजार क्षमतेचा वातानुकूलित हॉल पुढच्या काळात उभारला जाईल. विकासकामांसाठी भरपूर निधी आणू, असे आश्वासन मंत्री मुश्रीफ यांनी दिले.
अच्युतराव साळोखे यांनी स्वागत केले. आदिल फरास यांनी प्रास्ताविकात प्रभागातील कामांचा आढावा घेतला. आर. के. पोवार यांचे भाषण झाले. यावेळी माजी महापौर हसिना फरास यांचा पाच वर्षांच्या कार्याचा गौरव करण्यात आला, तर ‘शिवस्वराज्य दिन’ साजरा करण्याचा निर्णय घेतल्याबद्दल मुश्रीफ यांचा सत्कार करण्यात आला. सचिन चव्हाण यांनी आभार मानले. यावेळी शारंगधर देशमुख, निवास शिंदे, इंद्रजित यादव, बाबासाहेब पोवार उपस्थित होते.
(फोटो)