शहापूर खणीभोवती संरक्षक भिंतीसाठी लाक्षणिक उपोषण

इचलकरंजी : येथील शहापूर खणीच्या सभोवती संरक्षक भिंत बांधण्यात यावी या मागणीसाठी बहुजन क्रांती दलाने बुधवारी खण परिसरात निषेध व्यक्त करत लाक्षणिक उपोषण केले. वारंवार मागणी करूनही दुर्लक्ष होत, असून संरक्षक भिंतीचे काम सुरू न झाल्यास नगरपरिषदेवर धडक मोर्चा काढण्याचा इशारा यावेळी दिला. शहापूर खणजवळील रस्त्यावरुन नेहमी अवजड व अन्य वाहनांची मोठी वर्दळ असते. खणीला संरक्षक कठडे नसल्याने खणीच्या पाण्यात पडून वाहनांचा अपघात होऊन जीवितहानी होण्याचा धोका असल्याने संरक्षक भिंत बांधण्याची सातत्याने मागणी करूनही लोकप्रतिनिधी व प्रशासनाने दुर्लक्ष केल्याचा आरोप संघटनेने केला. या अनुषंगाने बुधवारी संघटनेच्यावतीने शहापूर खण परिसरातच एकदिवसीय लाक्षणिक उपोषण करण्यात आले. या जिव्हाळ्याच्या प्रश्नासंदर्भात लोकप्रतिनिधी व प्रशासनाने तातडीने कार्यवाही न केल्यास तीव्र आंदोलन करण्याचा इशारा जिल्हाध्यक्ष नागराज हजारे यांनी दिला. उपोषणामध्ये अनिल मदने, अब्राहम भोसले, अनिल लोंढे, अरुणा जाधव, हसिना मुल्लाणी, प्रवीण आवळे, कुणाल कांबळे, मंदाकिनी जांभळे यांच्यासह अन्य पदाधिकारी व कार्यकर्ते सहभागी होते.