खोकुर्ले (ता. गगनबावडा) येथे भरधाव ट्रकने सायकलला पाठीमागून धडक दिल्याने बाळू भागोजी कांबळे (वय ७१ ) यांचा जागीच मृत्यू झाला. याबाबतची फिर्याद त्यांचा मुलगा दिनकर बाळू कांबळे यांनी गगनबावडा पोलीस स्थानकात दिली आहे.
अधिक माहिती अशी की, बाळू भागोजी कांबळे हे सायकलवरून दुपारी दोनच्या सुमारास शेताकडे निघाले होते. याचवेळी कोल्हापूरहून गगनबावड्याकडे भरधाव निघालेल्या ट्रकने खोकुर्ले स्मशानभूमीजवळ बाळू कांबळे यांना धडक दिली. त्यामुळे बाळू कांबळे यांचा जागीच मृत्यू झाला. यावेळी या ट्रकने आणखी एका ट्रकला जोराची धडक देऊन त्या ट्रकचे अंदाजे दहा हजाराचे नुकसान केले आहे. अपघात झाल्यावर अपघाताची वर्दी न देता, ट्रकचालक अरुण लक्ष्मण मिठबावकर ( मु. माळवाडी, ता. मालवण, जि. सिंधुदुर्ग) हा पळून गेला.
बाळू कांबळे यांच्या पश्चात पत्नी, दोन विवाहित मुले, सुना, नातवंडे असा परिवार आहे.या अपघाताची माहिती खोकुर्ले गावचे पोलीसपाटील कैलास इंजर यांना मिळताच त्यांनी गगनबावडा पोलीस स्थानकात याची माहिती दिली. गुन्ह्याचा अधिक तपास पो. हवलदार आर. डी. सौदडे यांच्या मार्गदर्शनाखाली पो. नाईक अनिल पाटील, प्रवीण पाटील, जयदीप बागडी, युवराज बोबडे करत आहेत.
फोटो = बाळू कांबळे