Kolhapur: उपसरपंचाकरवी पाच हजारांची लाच स्वीकारली, शिंगणापूरचा तलाठी जाळ्यात

दोघांनाही अटक : सातबाऱ्यावर नाव लावण्यासाठी दहा हजारांची मागणी

कोल्हापूर : खरेदी केलेल्या जमिनीच्या सातबारा उताऱ्यावर वडिलांचे नाव लावण्यासाठी उपसरपंचाकरवी पाच हजार रुपयांची लाच स्वीकारताना शिंगणापूर सज्जातील तलाठ्यास लाचलुचपत प्रतिबंधक पथकाने गुरुवारी अटक केली.

तलाठी इरफान दिलावर सनदी (वय ४१, रा. शिवाजी कॉलनी, लाइन बाजार, कोल्हापूर) व उपसरपंच दीपक सदाशिव कांबळे (वय ४३), असे अटक केलेल्यांची नावे आहेत. कारवाईत तलाठी आणि उपसरपंच जाळ्यात सापडल्याने महसूल आणि ग्रामपंचायत प्रशासनात खळबळ उडाली.

लाचलुचपत प्रतिबंधक प्रशासनाने सांगितले की, शिंगणापूर सज्जात अनेक दिवसांपासून सनदी तलाठी म्हणून काम करीत होता. यातील तक्रारदार हे खरेदी केलेल्या जमिनीच्या सातबारा उताऱ्यावर वडिलांचे नाव लावण्यासाठी तलाठी कार्यालयात आले होते. दरम्यानच्या काळात तक्रारदार यांना उपसरपंच कांबळे याने तलाठीकडून नाव लावून घेण्यासाठी सुरुवातील दहा हजार रुपये लाचेची मागणी केली. तडजोडीअंती पाच हजार रुपये द्यावे, असे सांगितले. 

कांबळे यांनी सांगितलेल्या पाच हजार रुपयांच्या लाचेस तलाठी सनदी याने दुजोरा दिला. त्यांनी बेकायदेशीरपणे लाच मागणी केल्याचे निष्पन्न झाले. याची तक्रार लाचलुचपत प्रतिबंधक विभागाकडे बुधवारी केली. त्यानंतर पथकाने सापळा रचला. गुरुवारी शिंगणापूर तलाठी कार्यालयात तडजोडीची पाच हजार रुपये सनदी याच्यासाठी उपसरपंच कांबळे याने लाच म्हणून रंगेहाथ मिळाला. करवीर पोलिस ठाण्यात भ्रष्टाचार प्रतिबंधक अधिनियम सात आणि सात अ कलमान्वये गुन्हा नोंद करण्याची प्रक्रिया सायंकाळी उशिरापर्यंत सुरू आहे.

कार्यालयाची झडती...

लाचलुचपत प्रतिबंधक विभागाच्या पथकाने लाच घेताना सापडल्यानंतर तलाठी कार्यालयाची झडती घेण्यात आली. तलाठी सनदी आणि उपसरपंच कांबळे याची अंग आणि वाहन झडतीही घेण्यात आली. यावेळी लाच रक्कम दीपक कांबळे यांनी तक्रारदार यांना तलाठी कार्यालयाचे बाजूस असलेल्या रूममधील टेबलच्या ड्रॉवरमध्ये ठेवण्यास सांगितल्याचे समोर आले. पथकाने ड्रॉवरमधील लाच रक्कम आणि मोबाइल जप्त केले.

सायंकाळी उशिरापर्यंत घरझडती..

लाचलुचपत प्रतिबंधक पथकाकडून सायंकाळी उशिरापर्यंत आरोपीच्या शिंगणापूर आणि कोल्हापुरातील घरझडतीची प्रक्रिया सुरू होती.

लाचेची मागणी केल्यास संपर्क साधा...

लाचेची अथवा अपसंपदेबाबत कोल्हापुरातील लाचलुचपत प्रतिबंध विभागाच्या कार्यालयाकडे तक्रार करावी. उपअधीक्षक वैष्णवी पाटील यांच्या ९७६४१४०७७७, ९४०४३२१०६४ किंवा कार्यालय ०२३१-२५४०९८९, हेल्पलाईन क्रमांक १०६४ येथे संपर्क साधावा, असे आवाहन करण्यात आहे.