कोल्हापूर : रंगपंचमी व वाढत्या कोरोनाच्या पार्श्वभूमीवर पोलीस दलाने शहरासह जिल्ह्यात शुक्रवारी मोठ्या प्रमाणात पोलीस बंदोबस्त तैनात केला होता. यात दिवसभरात ७७० जणांवर विविध विनामास्क, हुल्लडबाजी आणि प्रतिबंधात्मक कारवाई करण्यात आली.
रंगपंचमीनिमित्त शुक्रवारी सकाळपासून जिल्ह्यातील प्रत्येक चौक, महत्त्वाचे मार्ग, गर्दीच्या ठिकाणी चोख पोलीस बंदोबस्त ठेवण्यात आला होता. दंगा-मस्ती करत फिरणाऱ्या हुल्लडबाजांची पोलिसांनी धरपकड केली. नियम मोडणाऱ्या वाहनधारकांवर दंडात्मक कारवाई झाली. यात विनामास्क फिरणाऱ्या ५०० जणांवर दंडात्मक, तर हुल्लडबाजी करणाऱ्या ७० युवकांना ताब्यात घेऊन सोडण्यात आले. याशिवाय दोन शेजणांवर प्रतिबंधात्मक कारवाई करण्यात आली.
गेल्या तीन वर्षांत रंगपंचमी खेळताना इचलकरंजीत वादावादी व हाणामारीचे प्रकार घडले होते. जिल्ह्यात पूर्वी घडलेल्या घटनांची माहिती घेऊन ज्या त्या गावांत, शहरांत चोख पोलीस बंदोबस्त ठेवण्यात आला होता. शहरातील प्रत्येक चौकात नाक्यावर पोलीस थांबून वाहनधारकांची चौकशी करीत होते. रंग उधळून धिंगाणा घालणारे, मोठ्याने ओरडत फिरणाऱ्यांना पकडून कारवाई केली जात होती. विविध पोलीस ठाण्यांतर्गत एकूण २०० नोंदीत गुन्हेगारांवर प्रतिबंधात्मक कारवाई करण्यात आली. शहरात प्रवेश करणाऱ्या तावडे हॉटेल, ताराराणी चौक, दाभोलकर कॉर्नर, व्हीनस कॉर्नर, दसरा चौक, शिवाजी पूल, वडणगे फाटा, कसबा बावडा, राजारामपुरी, सायबर चौक, विद्यापीठ परिसर, कळंबा चौक, मंगळवार पेठ, बिनखांबी गणेश मंदिर, शिवाजी पेठ, लक्षतीर्थ वसाहत, सानेगुरुजी वसाहत रस्ता याठिकाणी पोलीस बंदोबस्त तैनात केला होता.
जागोजागी छेडछाडविरोधी पथके तैनात
कोरोनाच्या पार्श्वभूमीवर पोलिसांनी शहरातील गल्लीबोळांतून पोलीस व्हॅन, दुचाकीवरून गस्त घातली. यात गर्दी टाळण्यासह मास्कचा वापर करा, सोशल डिस्टन्स ठेवा, अशा सूचना केल्या जात होत्या. बीट मार्शलची वाहनेही गस्तीत सहभागी होती. जल्लोषी वातावरणात हाणामारी, महिला, तरुणींची छेडछाड रोखण्यासाठी साध्या वेशातील पोलीस पथके तैनात करण्यात आली होती.
चौकट
मोटर वाहन कायद्याप्रमाणे शहर वाहतूक शाखेने केलेली कारवाई अशी,
एकूण केसेस - ९२८
ट्रिपल सीट - १३८
एकेरी मार्ग नियमभंग - १२२
दंड वसूल - ८८ हजार ८००