विद्यार्थी भीतीच्या छायेखाली

सूरज पोवार मृत्यू प्रकरण : पोलीस बंदोबस्त; पालकांनी मुलांना घरी बोलावले

कोल्हापूर : पाचगाव (ता. करवीर) येथील राजर्षी छत्रपती शाहू आश्रमशाळेचा विद्यार्थी सूरज शामराव पोवार याच्या मृत्यूनंतर आज, शुक्रवारी या शाळेतील विद्यार्थ्यांच्या पालकांनी मुले नेण्यास सुरुवात केली. करवीर पोलिसांनी शाळेच्या आवारात पोलीस बंदोबस्त ठेवला आहे. दरम्यान, याप्रकरणी शाळेतील अधीक्षक, दोन विद्यार्थी यांच्यावर आत्महत्येस प्रवृत्त, मारहाण असे गुन्हे दाखल करण्यात आले आहेत. आज या प्रकरणी गांधीनगर पोलिसांकडून कोणास अटक करण्यात आली नसल्याचे सहायक पोलीस निरीक्षक संभाजी गायकवाड यांनी सांगितले.
शिक्षकांनी वारंवार सूरज पोवार याची अवहेलना केली. यामधून सूरजने उचगाव (ता. करवीर) येथे घरामध्ये जाळून घेतले. यामध्ये तो काल, गुरुवारी राजारामपुरीतील एका खासगी रुग्णालयात उपचार सुरू असताना मृत्यू झाला. याचा उद्रेक होऊन शाळेतील अधीक्षक संशयित कांतू जाधव (रा. सोलापूर) व इतरांना अटक झाल्याशिवाय शांत बसणार नाही, असा आक्रमक पवित्रा पोलिसांसमोर घेतला. त्यानुसार गांधीनगर पोलीस ठाण्यात त्याच्यावर गुन्हा दाखल करण्यात आला. आज सकाळपासून या शाळेतील विद्यार्थ्यांचे पालक पाल्यांना नेण्यासाठी या ठिकाणी येत होते, तर या ठिकाणी पोलिसांनी बंदोबस्त ठेवला आहे. मुख्यालयातील ११ व करवीर पोलीस ठाण्याचे चार असे १५ पोलीस बंदोबस्तासाठी आहेत. या आश्रमशाळेत सुमारे १३० पटसंख्या आहे. यातील सुमारे शंभर मुलांना सूरज पोवार यांच्या मृत्यूच्या घटनेनंतर त्यांच्या पालकांनी नेले आहे. त्याचबरोबर शाळाही बंद स्थितीत असून शिक्षकांनी याकडे पाठ फिरविली आहे. (प्रतिनिधी)

सूरजला आश्रमशाळेची श्रद्धांजली
काल, गुरुवारी सकाळी आश्रमशाळा सुरू होती. पहिली ते नववीपर्यंतचे याठिकाणी शिक्षण सुरू आहे.
सूरज हा मृत झाल्याचे समजताच आवारातील फलकावर त्याला श्रद्धांजली वाहण्यात आली. त्यानंतर शाळा सोडण्यात आली.
आज दिवसभर काही मुले शाळा नसल्याने शाळेतील मैदानावर दंग होती,
तर काही मुले भीतीच्या छायेखाली वावरत होती.