गगनबावड्यात तुफान पाऊस, धबधबे लागले वाहू!

गगनबावडा- गगनबावडा परिसर आणि करूळ घाटात गुरुवारी सायंकाळी चारपासून सुमारे दोन तास तुफान पावसाने झोडपून काढले. धुक्यात करूळ घाट हरवल्याने आणि खराब रस्त्यांमुळे वाहनचालकांची दमछाक होत होती. वैभववाडी ते गगनबावडा या पट्ट्यात काल सायंकाळी चार वाजता पाऊस उतरून काळोख पडला होता. पावसाला तुफान सुरुवात झाली होती. करूळ घाटातून धुके पसरल्याने आणि तुफान पाऊस असल्याने पुढचा रस्ताच दिसत नव्हता. अवजड वाहनांची रांगच लागली होती. गगनगिरी पर्वतावर प्रचंड पावसाने घाटातील आठा-दहा धबधबे जोरदार वाहत होते. अनेक ठिकाणी घाटात रस्ते उखडलेले असल्याने आणि त्यावरून वाहणाऱ्या पाण्याने वाहने चालविणे अवघड होत होते. अवजड वाहने एकामागोमाग लागल्याने कोकणात जाणाऱ्या-येणाऱ्या गाड्यांना मार्ग काढणे कठीण होत होते. करूळ घाटात यापूर्वी झालेल्या प्रचंड पावसाने अनेक ठिकाणी छोट्या-छोटया दरडी कोसळून मोहरीमध्ये अडथळे निर्माण झाले आहेत. परिणामी पावसाचे पाणी रस्त्यावर येऊन ते उखडून गेले आहेत. अनेक ठिकाणी दोन-दोन फुटांचे खड्डे पडले आहेत. बहुतेक सर्व अवघड वळणावरील रस्ते पूर्णतः उखडल्याने अवजड वाहनांना पुढे सरकताच येत नाही. अनेक ठिकाणचे रस्ते पाण्यामुळे उखडले आहेत. करूळ घाटच उद्ध्वस्त झाला आहे. गगनबावड्याच्या सीमेवर कोल्हापूर जिल्ह्यात प्रवेश करतानाचा रस्ता चांगला आहे; पण बावडा ते साळवण मार्गावर अनेक ठिकाणी पावसाचे पाणी साचल्याने रस्ता खड्डेमय झाला आहे. काही ठिकाणी खड्डे खोल असल्याने वाहने चालविणे कठीण होते. जेथे-जेथे रस्त्याकडेचे पाणी रस्त्यावर आले आहे, तेथे चाळण झाली आहे. रस्त्यावर येणारे पाणी अडविणे किंवा त्याला मार्ग काढून न दिल्याने गेल्या उन्हाळ्यात केलेला रस्ता अनेक ठिकाणी उद्ध्वस्त झाला आहे. काही ठिकाणी खड्ड्यांची छोटी तळीच झाली आहेत. कोकणात आणि गोव्याकडे रात्रीच्यावेळी जाणारी अवजड वाहने तसेच खासगी आराम गाड्यांना अपघात होण्याची शक्यता नाकारता येत नाही.