कोल्हापूर : शिंदेसेनेच्या कागल तालुक्यातील कापशी जिल्हा परिषद मतदारसंघातील उमेदवार अश्विनी मकरंद कोळी यांच्याविरोधात अश्विनी परशराम तावरे यांनी येथील सर्किट बेंचमध्ये सोमवारी याचिका दाखल केली आहे.
याचिकेत म्हटले आहे की अश्विनी कोळी या शिक्षण प्रसारक मंडळ कोल्हापूर या संस्थेच्या मुरगुड विद्यालयात सहायक शिक्षिका आहेत. त्या शिंदेसेनेकडून कापशी मतदारसंघातून जिल्हा परिषदेची निवडणूक लढवत आहेत. त्यांना शासकीय निधीतून दर महिन्याला वेतन अदा करण्यात येते. त्यामुळे त्यांनी शासकीय कर्मचाऱ्यांसाठी लागू असलेल्या नियमानुसार आधी राजीनामा देऊन मग जिल्हा परिषदेसाठी आपले नामनिर्देशनपत्र दाखल करणे आवश्यक होते.
परंतु, तसा राजीनामा त्यांनी दिलेला नाही. तरीही निवडणूक निर्णय अधिकारी यांनी त्यांचे नामनिर्देशनपत्र स्वीकारले असून ते मंजूरही केले आहे. त्यामुळे त्यांचे नामनिर्देशनपत्र रद्द करावे अशी मागणी याचिकेत करण्यात आली आहे. अश्विनी तावरे यांनी राज्य निवडणूक आयोग, निवडणूक निर्णय अधिकारी, महाराष्ट्र शासन, अश्विनी कोळी यांच्यासह या मतदारसंघातील अन्य दोन उमेदवारांना प्रतिवादी केले आहे.