कागल कागल शहरात ५२ कोटी रुपयांची विकासकामे सुरू आहेत. कामे दर्जेदारच होतील. याकडे माझे वैयक्तिक लक्ष आहे. विरोधकांनी विकासकामांबद्दल जबाबदारीने बोलावे, अशी माझी विनंती आहे. टीका करायचीच म्हणून जर काहीही टीका करत असाल तर खपवून घेणार नाही. विनाकारण गैरसमज करू नयेत, असा विनंतीवजा इशारा ग्रामविकास मंत्री हसन मुश्रीफ यांनी दिला.
कागल शहरातील ७ कोटी ८६ लाख रुपये खर्चाच्या विविध विकासकामांचा शुभारंभ त्यांच्या शुभहस्ते करण्यात आला. त्यावेळी ते बोलत होते. अध्यक्षस्थानी नगराध्यक्षा माणिक माळी होत्या. उपनगराध्यक्ष बाबासाहेब नाईक, मुख्याधिकारी पंडित पाटील, सरसेनापती संताजी घोरपडे साखर कारखान्याचे अध्यक्ष नवीद मुश्रीफ, चंद्रकांत गवळी, पी. बी. घाटगे आदी मान्यवर उपस्थित होते.
भाजपाचे कार्यकर्ते नितीन नासीपुडे यांनी यावेळी राष्ट्रवादी काँग्रेसमध्ये प्रवेश केला.
शहरातील महात्मा फुले मार्केटचे संपूर्ण नूतनीकरण, वातानुकूलित तीन मजली मटण फिश मार्केट आणि कंपोस्ट खत डेपोजवळ कत्तलखाना बांधकाम अशा कामांचा शुभारंभ करण्यात आला. स्वागत प्रास्ताविक प्रवीण काळबर यांनी केले. भैय्या माने, रमेश माळी, प्रकाश गाडेकर, यांची भाषणे झाली. आभार सौरभ पाटील यांनी मानले. कार्यक्रमास सर्व नगरसेवक, नगरसेविका, कार्यकर्ते मोठ्या संख्येने उपस्थित होते.
चौकट
● नगरपालिका निवडणुकीचे रणशिंग फुंकले.
मंत्री मुश्रीफ म्हणाले की येणाऱ्या नगरपालिका निवडणुकीत कागल शहराचा विकास कोण करू शकतो. हे पाहून मतदान करा. या कागलचे नाव राज्यात कोणी केले तसेच लाथ मारील तेथे पाणी कोण काढेल. हे बघून मतदान करा. मी गेली पस्तीस वर्षे कागल शहरातच राहुन तुमच्या सुख-दुःखात सामील आहे. आतापर्यंत जशी साथ दिली तशीच साथ द्या..
फोटो कॅप्शन
कागल शहरातील महात्मा फुले मार्केटच्या नूतनीकरण कामाचा शुभारंभ ग्रामविकास मंत्री हसन मुश्रीफ यांच्या हस्ते आज करण्यात आला. यावेळी नगराध्यक्षा माणिक माळी, भय्या माने, नवीद मुश्रीफ व मान्यवर उपस्थित होते.