कोल्हापूर : महानगरपालिका क्षेत्रात गेली अनेक वर्षे मोकळ्या जमिनीचे प्लॉट पाडून ले-आऊट द्वारा त्यांची विक्री व विकास सुरू आहे. अशा मंजूर ले-आऊटमधील खुल्या जागा महापालिकेने अद्याप ताब्यात घेतलेल्या नाहीत. त्या तातडीने ताब्यात घेऊन त्यावर महापालिकेचे नाव लावावे, अशा मागणीचे निवेदन गुरुवारी माजी नगरसेवक अजित ठाणेकर, विजय खाडे पाटील व किरण नकाते यांनी प्रशासक डॉ. कादंबरी बलकवडे यांना दिले.
महानगरपालिकेच्या नगररचना विभागाने सुरुवातीपासून शेकडो ले-आउट मंजूर केले आहेत. त्यावर आता मोठ्या कॉलनीज वसलेल्या आहेत. या ले-आउटमधील खुली जागा, नागरी सुविधांच्या जागा, ले-आउट विकसित करतेवेळी महानगरपालिकेस हस्तांतरित करण्याचा कायदा आहे. तरीसुद्धा कोल्हापूर शहरातील शेकडो ले-आऊटच्या खुल्या जागा महानगरपालिकेच्या नगररचना विभागाने आपल्या ताब्यात घेतलेल्या नाहीत, तसेच त्यांच्या कागदपत्रावर महानगरपालिकेचे नावही चढविलेले नाही.
काही जुन्या ले-आऊटमधील खुल्या जागा बेकायदेशीर पद्धतीने विक्री करण्यात येत आहेत. ही बाब अत्यंत गंभीर असून नगररचना विभागाच्या दुर्लक्षामुळे व बेजबाबदारपणामुळे महानगरपालिकेच्या शेकडो जागा खासगी मिळकतीत तबदील होण्याची शक्यता आहे. म्हणूनच या प्रकरणी प्रशासक म्हणून तातडीने व वैयक्तिक लक्ष घालून सर्व खुल्या जागा ताब्यात घेऊन त्यावर महानगरपालिकेचे नाव लावावे आणि महानगरपालिकेचे होणारे नुकसान टाळावे, असे निवेदनात नमूद करण्यात आले आहे.