कोल्हापूर : सोने गहाण कर्जावेळी दिलेले सोने पतसंस्थेकडे प्रत्यक्षात नसून, आम्ही पैसे भरण्यास तयार असूनही संस्था आमचे सोने परत देत नसल्याचे गुरुवारी येथे अवसायानात निघालेल्या भुदरगड सहकारी पतसंस्थेच्या काही कर्जदारांनी सांगितले. पतसंस्थेतील कर्जदारांसाठी ओटीएस योजना लागू करा, चुकीच्या पद्धतीने झालेल्या लिलाव प्रक्रियेची सखोल चौकशी करा, अशा सूचना आमदार प्रकाश आबिटकर यांनी यावेळी दिल्या. त्यांच्या पुढाकारातूनच ही बैठक झाली. यावेळी काही कर्जदारांना आपल्या व्यथा सांगताना रडू कोसळले.
भुदरगड थकबाकीदार कर्जदारांच्या प्रलंबित प्रश्नासाठी कोल्हापुरात शासकीय विश्रामगृहावर बैठक घेऊन आमदार आबिटकर यांनी कर्जदार व अधिकारी यांच्यात संवाद घडवून आणला. अवसायक मंडळाकडून सुरू असलेल्या कर्ज वसुली प्रक्रियेमुळे नाधवडे ( ता. भुदरगड) येथील कर्जदार शामराव पाटील यांनी कंटाळून आत्महत्या केल्याचे त्यांचे भाऊ उमाजी पाटील यांनी पाणावलेल्या डोळ्यांनी सांगितले. उद्योग-व्यवसायासाठी घेतलेल्या कर्जाची परतफेड होत नसल्याने संस्थांच्या प्राॅपर्टी व जमिनींवर बोजा चढविण्यात आले आहेत. ओटीएसकरिता तयार असणाऱ्या कर्जदारांनाही योजनेपासून वंचित ठेवून त्यांच्याकडून सक्तीने कर्जवसुली करत असल्याचे तक्रारदारांनी सांगितले.
अवसायक मंडळाकडून कर्जदारांना कर्ज वसुलीच्या नोटीस लागू झाल्या आहेत. या पार्श्वभूमीवर आमदार आबिटकर यांनी कर्जदारांशी सहानुभूतीने वागण्याच्या सूचना दिल्या. कर्जदारांना मानवतेच्या भावनेतून मदत करण्याकरिता अवसायक मंडळाने सहकार्य करावे, असेही त्यांनी सुचवले. या बैठकीला प्रभारी विभागीय सहनिबंधक अरुण काकडे, जिल्हा उपनिबंधक अमर शिंदे, सहाय्यक निबंधक प्रदीप मालगावे, लेखापरीक्षक व अवसायक मंडळ सदस्य डी. बी. यादव, विशेष कार्यकारी अधिकारी हर्षवर्धन यादव, राहुरी कृषी विद्यापीठाचे संचालक दत्तात्रय उगले, कल्याण निकम, शिवसेना उपजिल्हाप्रमुख प्रकाश पाटील, आबूभाई तहसीलदार उपस्थित होते.
फोटो: ०२०९२०२१-कोल-भुदरगड
फोटो ओळ : अवसायनात गेलेल्या भुदरगड नागरी सहकारी पतसंस्थेच्या थकबाकीदार कर्जदारांच्या प्रलंबित प्रश्नासाठी गुरुवारी कोल्हापुरात शासकीय विश्रामगृहावर आमदार प्रकाश आबिटकर यांनी सहकार विभागाच्या अधिकाऱ्यांसमवेत बैठक घेतली. यावेळी कर्जदारांनी आपल्या व्यथा मांडल्या.