पतंगरावांची गाडी वसगडेत रोखली

रास्ता रोको : ऊसप्रश्नी ‘स्वाभिमानी’चे कार्यकर्ते आक्रमक

भिलवडी : कोल्हापूर जिल्ह्याप्रमाणे सांगली जिल्ह्यातील साखर कारखान्यांनी प्रती टन २५०० रुपयांवर पहिली उच्चल द्यावी, या मागणीसाठी स्वाभिमानी शेतकरी संघटनेच्यावतीने शनिवारी वसगडे (ता. पलूस) येथे सलग तीन तास कडकडीत रास्ता रोको आंदोलन केले. रस्तारोको दरम्यान, पोलीस बंदोबस्तात माजी मंत्री, आमदार डॉ. पतंगराव कदम यांची गाडीही संतप्त शेतक-यांनी रोखून ठेवली. आंदोलकांना न जुमानता कदम यांच्या गाडीने आपला मार्ग बदलल्याने संतप्त झालेल्या आंदोलकांनी साखरसम्राटांच्या निषेधाच्या तीव्र घोषणा दिल्या. यामुळे परिसरात काहीवेळ तणावाचे वातावरण निर्माण झाले होते.
स्वाभिमानी शेतकरी संघटनेच्या सांगली जिल्हा युवा आघाडीचे अध्यक्ष संदीप राजोबा यांच्या नेतृत्वाखाली शनिवारी सकाळी १० .३० वाजल्यापासून सांगली-पलूस रस्त्यांवर वसगडे गावच्या बसस्थानकासमोर रास्ता रोको आंदोलन केले. पलूस तालुक्यातील पाचशेंवर शेतकऱ्यांनी रस्त्यावर ठिय्या मांडला. याचवेळी पतंगराव कदम हे पोलिसांच्या पायलट वाहनांसह पलूसहून वसगडेमार्गे सांगलीला निघाले होते. दुपारी १२ वाजता गाडी वसगडे येथे आंदोलनस्थळी आली. त्यावेळी साखरसम्राटांचा धिक्कार असो,अशा घोषणा आंदोलकांनी दिल्या. पोलीस अधिकाऱ्यांनी खाली उतरून गाडीला रस्ता देण्याची मागणी केली. मात्र आंदोलकांनी गाडी सोडणार नसल्याचा पावित्रा घेतला, कदम यांनी खाली उतरून शेतकऱ्यांशी संवाद साधावा, अशी विनंती केली. कदम यांनी स्वता:च्या कारखान्यांचा दर जाहिर करुन ऊस दराची कोंडी फोडावी अशीही मागणी आंदोलकांनी केली. मात्र कदम खाली न उतरता त्यांनी गाडयांची दिशा बदलून पाचवा मैलमार्गे ते सांगलीकडे गेले. त्यामुळे संतप्त झालेल्या आंदोलकांनी साखरसम्राटांविरोधात तीव्र घोषणा दिल्या.
दुपारी १.३० वा. पलूसचे नायब तहसीलदार बिपीन लोकरे यांनी आंदोलन स्थळास भेट देऊन निवेदन शासनाला कळविण्याचे आश्वासन दिले. त्यामुळे आंदोलन मागे घेण्यात आले. आंदोलनात स्वाभिमानीचे पलूस तालुका अध्यक्ष सूर्यकांत मोरे, सतीश पाटील, संतोष मोळाज, राजगोंड राजोबा, प्रमोद हजारे, सचिन सूर्यवंशी, लाला हजारे, सुधीर खोत, राजाभाऊ पाटील, संदीप पाटील, हणमंत पाटील आदीसह कार्यकर्ते सहभागी झाले. (प्रतिनिधी)