तावडे हॉटेल परिसरावर आठ दिवसांत हातोडा

महापालिका सर्वसाधारण सभेत निर्णय : घरफाळ्यासाठी वाढीव दंड आकारणीस नकार

 कोल्हापूर : तावडे हॉटेल ते गांधीनगर रस्त्यावरील मिळकतींची जागा महापालिकेची असल्याचा निकाल न्यायालयाने दिला आहे. आता कारणे न सांगता प्रशासनाने अतिक्रमण हटविण्याची कारवाई करावी, अशी जोरदार मागणी आज (मंगळवार) झालेल्या सर्वसाधारण सभेत नगरसेवकांनी केली. यानंतर शहर अभियंता, विभागीय कार्यालय क्रमांक -४ व नगररचना विभागाने तातडीने कारवाई करून अहवाल द्यावा, असे आदेश आयुक्त विजयालक्ष्मी बिदरी यांनी दिले. सभेच्या अध्यक्षस्थानी महापौर सुनीता राऊत होत्या. गेल्यावेळी तावडे हॉटेलप्रकरणी मात खाल्ल्यानंतर शिस्तबद्ध कागदपत्रे पुरविल्याने महापालिकेचा जागेवर हक्क अबाधित राहिला. आता विनाविलंब प्रशासनाने बांधकामे हटविण्यासाठी कारवाई करावी, पोलीस बंदोबस्ताचे कारण सांगून हात झटकू नयेत, अशी मागणी जयंत पाटील, निशिकांत मेथे, सचिन चव्हाण, शारंगधर देशमुख यांनी केली. महापालिकेचे वकील प्रशांत चिटणीस यांनी कारवाई करण्यात कोणतीही कायदेशीर अडचण नसल्याचे स्पष्ट केले. आयुक्तांनी तत्काळ कारवाईचे आदेश दिल्याने येत्या आठ दिवसांत प्रत्यक्ष अतिक्रमण हटविण्याची प्रक्रिया सुरू केली जाणार आहे. रस्त्यावरील विजेच्या खांबाच्या दुरुस्तीचे खासगीकरण केल्याने कामे रखडली आहेत, अशी तक्रार यशोदा मोहिते, प्रक ाश नाईकनवरे, भूपाल शेटे यांनी केली. सदरचा ठेका रद्द करून महापालिकेतर्फे पूर्ववत दुरुस्तीचे काम करण्यात येईल, असे प्रशासनाने स्पष्ट केले. शौचालयासाठी नव्याने उभारलेले सौर दिवे बंद पडले आहेत. यातील ९० टक्के दिव्यांची बॅटरी चोरीला गेल्याची माहिती महेश कदम व भूपाल शेटे यांनी दिली. करारानुसार ठेकेदाराकडून दुरूस्त करून घ्या, असे आयुक्त बिदरी यांनी जलअभियंता मनिष पवार यांना सांगून चोरीप्रकरणी पोलिसांत तक्रार दाखल करण्याची सूचना केली. कळंबा कारागृहाभोवती ५०० मीटर पुन:र्विकास प्रस्ताव फेटाळण्याची मागणी करीत मधुकर रामाणे यांनी यामुळे परिसरातील ५० कॉलनीतील २५ हजार कुटुंबांना अडचणी निर्माण होतील, असे सांगितले. ५०० की १५० मीटर याची शहानिशा करून हा प्रस्ताव पुनर्विचारासाठी राज्य शासनाकडे पाठविण्याचा महत्त्वाचा निर्णय सभेत घेण्यात आला. एचसीएल इन्फोसिस्टीम लिमिटेडने करारानुसार अंतर्गत सुविधेत बदल केलेले नाहीत, यामुळे कंपनीला नावात बदल करण्यास परवानगी न देण्याचा निर्णय सभेने घेतला. (प्रतिनिधी)