श्रीकांत ऱ्हायकर
लोकमत न्यूज नेटवर्क
धामोड : बुरंबाळी व नऊ नंबर ( ता. राधानगरी ) येथील तुळशी धरणग्रस्थांचा गेल्या सत्तेचाळीस वर्षांचा त्यांच्या राहत्या घराचा सात-बाराचा प्रश्न आज निकाली निघाला. जिल्हाधिकाऱ्यांनी भेट देऊन या धरणग्रस्तांना एक दिवसात त्यांच्या जमिनीचे सात-बारा करण्याचे आदेश दिले.
यावरती ‘लोकमत’ने ‘बुरंबाळी धरणग्रस्त सात-बाराच्या प्रतीक्षेत’ या मथळ्याखाली काल वृत्त प्रसारित केले हाेते. त्यानंतर काल पुन्हा एकदा जिल्हाधिकाऱ्यांनी संबंधित विभागाच्या अधिकाऱ्यांची बैठक बोलावून, आजच्या आज सात-बारा तयार करा, असे सुनावले. रात्री उशिरापर्यंत अधिकाऱ्यांनी ऑफिसमध्ये थांबून हे सात-बाराचे काम पूर्ण केले.
तुळशी धरण बांधणीपासून हे शेतकरी विस्थापित ठिकाणावर वास्तव्यास आहेत. त्यांचा हा हक्काचा सात-बाराचा लढा गेली कित्येक वर्षे चौकशीच्या प्रक्रियेत अडकला होता. या फाईलवर गेल्या कित्येक दिवसांपासून त्रुटी निघत होत्या. दहा दिवसांपूर्वी जिल्हाधिकारी दौलत देसाई यांनी चानक बुरंबाळी गावाला भेट दिली व या धरणग्रस्तांच्या मागण्या जाणून घेतल्या.
तेथूनच सात-बारा अपडेट करण्याच्या सूचना प्रशासनाला देऊन एकाच दिवसात सात-बारा तयार करण्याची सूचना केली. पण दहा दिवस लोटले तरी सात-बारा तयार न झाल्याने ‘लोकमत’ने यावर प्रकाशझोत टाकला. यानंतर जिल्हाधिकाऱ्यांनी सक्त सूचना देत सायंकाळपर्यंत सात-बारा अद्ययावत करण्याच्या सूचना केल्या. अधिकाऱ्यांनी रात्री उशिरापर्यंत कार्यालयात थांबूनच हे सात-बारा पूर्ण केले.
रात्री उशिरा ही बातमी बोंबाळे ग्रामस्थांना समजताच त्यांनी आपला इतक्या वर्षांचा प्रश्न निकाली निघाला, या आनंदात फटाक्यांची आतषबाजी करून विजयोत्सव साजरा केला.