शिरोळ : कोरोना विषाणूचा प्रादुर्भाव वाढत आहे. प्रशासन आवश्यक त्या उपाययोजना करीत असून, नागरिकांनी खबरदारी घ्यावी. शासनाने दिलेल्या सुचनांचे पालन करावे. दत्त साखर कारखान्याचे अध्यक्ष गणपतराव पाटील यांनी कोविड सेंटर सुरू करून सामाजिक बांधीलकी जोपासली आहे. इतरांनी दत्तचा आदर्श घ्यावा, असे आवाहन प्रांताधिकारी डॉ. विकास खरात यांनी केले.
येथील श्री दत्त शेतकरी सहकारी साखर कारखान्याच्या कार्यस्थळावर कारखान्याच्यावतीने सोमवारी कोविड सेंटरचे उद्घाटन प्रांताधिकारी डॉ. खरात यांच्याहस्ते झाले. अध्यक्षस्थानी दत्तचे अध्यक्ष गणपतराव पाटील होते. यावेळी तहसीलदार डॉ. अपर्णा मोरे, गटविकास अधिकारी शंकर कवितके, डॉ. पी. एस. दातार, कार्यकारी संचालक एम. व्ही. पाटील प्रमुख उपस्थित होते.
गणपतराव पाटील म्हणाले, दत्त कारखान्याच्या कार्यक्षेत्रातील जनतेच्या सोयीसाठी गतवर्षी याठिकाणी कोविड सेंटर सुरू करण्यात आले होते. पुन्हा कोरोना संसर्ग वाढत आहे. त्यामुळे येथे शंभर बेडचे कोविड सेंटर सुरू करण्यात आले आहे. यापैकी २५ ऑक्सिजन बेड आहेत. सेंटरमध्ये व्हेंटिलेटरचीही सोय करण्यात येणार आहे. सेंटरच्या माध्यमातून कोरोना बाधित रुग्णांना तत्काळ उपचार मिळणार आहेत.
याप्रसंगी नगराध्यक्ष अमरसिंह पाटील, अॅड. प्रमोद पाटील, विजय सूर्यवंशी, शेखर पाटील, महेंद्र बागे, दरगु गावडे, संजय पाटील, साहेबलाल पाटील, श्रीशैल हेगाणा, अशोक शिंदे, डॉ. नितीन मगदूम, दादासाहेब काळे यांच्यासह मान्यवर उपस्थित होते.
फोटो - १२०४२०२१-जेएवाय-०१
फोटो ओळ - शिरोळ येथे दत्त कारखान्याच्या पुढाकाराने कोविड सेंटरचे उद्घाटन झाले. यावेळी प्रांताधिकारी डॉ. विकास खरात, गणपतराव पाटील, अमरसिंह पाटील, तहसीलदार डॉ. अपर्णा मोरे, गटविकास अधिकारी शंकर कवितके यांच्यासह मान्यवर उपस्थित होते.