कोल्हापूर : येथील पंचगंगा नदीघाट परिसरात मंगळवारी प्रथेप्रमाणे वाहनांसोबत म्हैस पळविण्याची स्पर्धा घेण्याचा प्रयत्न सुरू होता. या परिसरात गर्दी वाढल्याने पोलिसांनी घटनास्थळी धाव घेताच उपस्थितांतून परिसरातून पळ काढला. त्यामुळे हा स्पर्धा घेण्याचा प्रयत्न उधळला.
पोलिसांकडून मिळालेली माहिती अशी की, पाडव्याच्या शुभमुहूर्तावर दरवर्षी पंचगंगा नदीघाट परिसरात म्हैस पळविण्याची स्पर्धा घेतली जाते; पण दोन वर्षांत कोरोना महामारीमुळे या स्पर्धा झाल्याच नाहीत. मंगळवारी पंचगंगा नदीघाटावर काही हुल्लडबाज तरुणांनी वाहनांसोबत म्हशी पळवत होते. पाडव्याच्या मुहूर्तावर म्हैस पळवण्याच्या स्पर्धाच सुरू आहे असे समजून तेथे बघ्यांची मोठी गर्दी झाली. याची माहिती लक्ष्मीपुरी पोलिसांना मिळाली. पोलिसांनी तातडीने घटनास्थळी धाव घेतल्याने बघ्यांची गर्दी केलल्या नागरिकांची पळापळ झाली. अचानक उडालेल्या गोंधळामुळे परिसरात तणाव निर्माण झाला होता. पोलिसांनी घटनास्थळी म्हैस पळवणाऱ्या दोघा तरुणांना ताब्यात घेऊन त्यांच्यावर प्रतिबंधक कारवाई केली.