पाचोरा : दि. २८ जून रोजी दुपारी कृषी उत्पन्न बाजार समितीचे मुख्य कार्यालय पाचोरा येथे प्रशासकीय मंडळाची सभा पार पडली. या सभेत मार्केट यार्डमधील लिलाव भाजी मंडईला ‘क्रांतिसूर्य महात्मा ज्योतिबा फुले’ यांचे नाव देण्याचा ठराव सोमवारी प्रशासकीय मंडळाच्या सभेमध्ये मंजूर करण्यात आला.
कृषी उत्पन्न बाजार समिती येथे असलेल्या मार्केट यार्डमधील लिलाव भाजी मंडई पाचोरा येथे दैनंदिन भाजीपाला विक्रीचा लिलाव भरतो. तालुक्यातील, जिल्ह्यातील शेतकरी आपल्या शेतातील पिकलेला भाजीपाला आणून या मार्केटमध्ये सर्व व्यापाऱ्यांना लिलाव करतात. दररोज पहाटे चार वाजता येथे भाजीपाल्याचा लिलाव केला जातो. यामध्ये अनेक व्यापारी व शेतकरी दररोज सहभागी होतात.
शहरातील सर्व छोटे-मोठे भाजी विक्रेते या लिलाव मंडई येथे भाजीपाला खरेदीसाठी दररोज येत असतात. बाजार समितीचे प्रशासक अनिल महाजन यांनी मुख्य प्रशासक दिलीप वाघ यांना लेखी पत्र देऊन हा विषय बैठकीच्या अजेंड्यावर घेण्यासंदर्भात विनंती केली होती. त्याअनुषंगाने सभेमध्ये हा विषय घेण्यात आला. अनिल महाजन यांनी या विषयाबाबत मार्केट यार्डमधील लिलाव भाजी मार्केटला ‘महात्मा ज्योतिबा फुले’ यांचे नाव देण्याबाबतचा प्रस्ताव मांडला.
या प्रस्तावाला सर्व प्रशासकीय मंडळाने एकमताने होकार दिला. मुख्य प्रशासक दिलीप वाघ, प्रशासक रणजित पाटील, चंद्रकांत धनवडे, अभय पाटील, युवराज पाटील, शिवाजी पाटील यांनी प्रस्तावाला संमती दर्शवली व एकमताने हा प्रस्ताव मंजूर करण्यात आला.