स्टार - ९०२
सागर दुबे
लोकमत न्यूज नेटवर्क
जळगाव : सध्या दहा वर्षांपेक्षा कमी वयोगटातील मुलांना कोरोना होण्याची शक्यता सर्वाधिक आहे. शिक्षण विभागाने शाळा सुरू करण्यासंदर्भात चाचपणी सुरू केली असली तरी पहिली ते चौथीच्या विद्यार्थ्यांच्या शाळा सद्यस्थितीत सुरू होण्याची चिन्हे नाहीत, हे स्पष्ट आहे. दरम्यान, ऑनलाइन शिक्षणामुळे ही चिमुकली अभ्यासाला लागली नाहीत आणि यामुळे पालक, शिक्षक मात्र हैराण झाले आहेत. शाळा बंद असल्याने अजूनही यांचा सुट्टीचा मूड कायम असल्याच्या प्रतिक्रिया पालक देत आहेत.
कोरोनाच्या पार्श्वभूमीवर गेल्या दीड वर्षापासून शाळा बंद आहेत. ऑनलाइन अभ्यास जरी सुरू असले तरी या ऑनलाइन अभ्यासामुळे सगळ्यांच्याच अभ्यासाची हेळसांड झालेली आहे. त्यात लहान मुलांच्या अभ्यासाचे मोठे शैक्षणिक नुकसान झाले आहे, असे मत पालक व्यक्त करत आहेत. शिक्षकांच्या प्रत्यक्ष मार्गदर्शनातून विद्यार्थी ज्या संकल्पना, अक्षर ओळख शिकतात त्यापासून सध्या विद्यार्थी वंचित राहत आहेत. ऑनलाइन वर्गात विद्यार्थ्यांना अभ्यासात एकाग्र करणे, समरस करणे शिक्षकांसाठी हे मोठे आव्हान ठरत आहे. वर्गात असताना इतर मुलांसोबत म्हणणे, कविता म्हणणे, अक्षर, प्राणी यांची तोंडओळख होणे या गोष्टी विद्यार्थ्यांसाठी सहज, सोप्या होत असतात; मात्र ऑनलाइन शिक्षणात मुलांना त्याचा कंटाळा येत असल्याने मुलांचा शिक्षणाचा पाया कच्चा राहत असल्याच्या तक्रारी पालक करीत आहेत.
पालकांनी घरातच घ्यावी शाळा...
कोरोनाची दुसरी लाट ओसरली असली तरी, कोरोनाचा धोका अजूनही टळलेला नाही. या कारणास्तव शाळा ही टप्प्याटप्प्याने सुरू करण्याचा विचार शिक्षण विभाग घेत आहे. ऑनलाइन पद्धतीनेच अभ्यास आणखी काही महिने तरी करू द्यावा, असे मत तज्ज्ञ व्यक्त करीत आहेत. विद्यार्थ्यांना विविध कामांतून, गोष्टीतून, गप्पांतून नवीन संकल्पना आणि विषय समजावून द्यावेत, दैनंदिन कामातून आकडेमोड आणि अक्षरओळख करून द्यावी, सहज बोलताना गाणी, कविता म्हणून घ्याव्यात आणि त्याच्यातून त्यांना धडे द्यावेत, असे तज्ज्ञ पालकांना सूचवितात.
००००००००००००
अभ्यास टाळण्यासाठी कारणे अनेक
- अनेकदा मुले ऑनलाइन नावाखाली गेम्स खेळताना, कार्टून व्हिडीओ बघताना सापडत असल्याच्या तक्रारी पालक करत आहेत.
- ऑनलाइन वर्गांना ही मुले बसतात खरी; पण त्यानंतर शिक्षकांनी सांगितलेला अभ्यास करताना मात्र ते टाळाटाळ करतात.
- प्रत्यक्षात शाळा सुरू असताना किमान ४ ते ५ तास शाळेत असणारी ही मुले घरी असताना मात्र कोणीतरी आले की अथवा पाणी प्यायचे आहे, भूक लागली आहे, बाहेर जायची कारणे देऊन अभ्यासावरून उठून टाळाटाळ करत असल्याची कारणे पालक देतात.
०००००००००००
पालकांची अडचण वेगळीच
गेल्या दीड वर्षापासून मुले घरातच आहेत. कोरोनामुळे मुलांना बाहेर जाता येत नाही. चिडचिडेपणा वाढला आहे. त्यामुळे पालकांची डोकेदुखी वाढली आहे. मोबाइलचे व्यसनही मुलांना लागले आहे.
- हर्षल पाटील, पालक
००००००००००
पूर्वी मुलांच्या हातात मोबाइल दिसला की, त्यांच्यावर रागवावे लागत होते. आता ऑनलाइन शिक्षणामुळे स्वत:हून त्यांना नाइलाजास्तव मोबाइल द्यावा लागत आहे. जर मुलांसोबत अभ्यासाला बसले नाही तर मुले अभ्यासाकडे दुर्लक्ष करतात.
- मनाली दीक्षित, पालक
००००००००००
मुलांना अक्षर ओळख होईना
- पहिली ते चौथीपर्यंतचे विद्यार्थी मोबाइल अथवा टॅबवर ऑनलाइन शिक्षण घेत आहेत. दरम्यान, ऑनलाइन शिक्षणामुळे विद्यार्थ्यांना आता अक्षर ओळख होण्यास अडचणी येत आहेत.
- ऑनलाइन शिक्षणामुळे मुलांसोबत पालकांना पूर्णवेळ गुंतून राहावे लागते. काही मुले मोबाइल हाताळणीत तरबेज झाली आहेत. मात्र, पालकांचे लक्ष हटताच हे पाल्य गेम खेळतात.
- जळगाव जिल्ह्यात लाखाच्यावर विद्यार्थ्यांकडे ऑनलाइन सुविधा नाहीत. परिणामी, या विद्यार्थ्यांना ऑनलाइन शिक्षणापासून वंचित राहावे लागत आहे. यामुळे मुलांचे मोठे नुकसान होत आहे. बेसिक पाया कच्चा राहत असल्याचे पालकांचे म्हणणे आहे.
००००००००००००
वर्गनिहाय विद्यार्थी
पहिली : ७६५१४
दुसरी : ७९३१३
तिसरी : ७७९१८
चौथी : ८००५०