माहोरा : जाफराबाद तालुक्यातील माहोरा येथील केंद्रीय प्राथमिक शाळेतील वर्गखोल्यांची दुरवस्था झाली आहे. पटसंख्या २१० असताना केवळ चार वर्गखोल्या सुस्थितीत असून, एका खोलीत ५० विद्यार्थ्यांना बसविण्याची वेळ शिक्षकांवर येत आहे.
लॉकडाऊन शिथिलतेनंतर टप्प्याटप्प्याने पाचवी ते दहावीपर्यंतचे वर्ग, महाविद्यालये सुरू झाली आहेत. आता प्राथमिक शाळा सुरू करण्याचा निर्णयही शासनाने घेतला आहे. परंतु, माहोरा केंद्रीय प्राथमिक शाळेच्या इमारतीची दुरवस्था झाली आहे. केंद्रीय प्राथमिक शाळेत १ ते ४ थी पर्यंत वर्ग असून, २१० पटसंख्या आहे. एक मुख्याध्यापक आठ कर्मचारी येथे कार्यरत आहेत. या शाळेत सध्या केवळ चार वर्गखोल्या सुस्थितीत आहेत. वर्गखाेल्या कमी असल्याने विद्यार्थ्यांना दाटीवाटीने एकाच वर्गखोलीत बसून अभ्यास करावा लागतो. याकडे शिक्षण विभागाने लक्ष देऊन शाळा सुरू होण्यापूर्वी विद्यार्थ्यांची होणारी गैरसोय दूर करावी, अशी मागणी शालेय समितीचे अध्यक्ष संतोष गौरकर व पालकांनी केली आहे. वर्ग खोल्यांबाबत शालेय समितीने ठरावही शिक्षण विभागाला दिल्याचे सांगण्यात आले.
पाठपुरावा सुरू
माहोरा केंद्रीय प्राथमिक शाळेची इमारत आणि वर्गखोल्यांबाबतचा अहवाल वरिष्ठांना दिला आहे. वर्ग खोल्यांचा प्रश्न सुटावा, यासाठी वरिष्ठांकडे पाठपुरावा सुरू आहे.
अनिल गवई, मुख्याध्यापक
फोटो