भारताचे 'जेम्स बाँड' अजित डोवाल यांची अमेरिकेशी महत्त्वाची चर्चा, देशाच्या सुरक्षेसंबंधी बोलणी

NSA Ajit Doval, India America Relations: एका निवेदनाद्वारे अमेरिकेकडून या चर्चेबद्दलची माहिती सार्वजनिक केली आहे

NSA Ajit Doval, India America Relations: लडाखच्या डेपसांग आणि डेमचोक या विभागातील भारतीय आणि चिनी सैन्याच्या माघारीची प्रक्रिया पूर्ण झाल्याची माहिती भारतीय लष्कराने मंगळवारी दिली होती. भारत आणि चीनमधील या करारावर रशिया आणि अमेरिकेसह जगातील अनेक देश लक्ष ठेवून आहेत. या निर्णयाच्या एका दिवसानंतर, राष्ट्रीय सुरक्षा सल्लागार (NSA) अजित डोवाल यांनी गुरुवारी त्यांचे अमेरिकन सुरक्षा सल्लागार जेक सुलिव्हन यांच्याशी दूरध्वनीवरून चर्चा केली. इंडो-पॅसिफिक प्रदेशात आणि जागतिक स्तरावर स्थिरता सुनिश्चित करण्यासाठी NSA ने अधिक प्रयत्न करण्याची गरज असलेल्या प्रदेशातील अद्ययावत सुरक्षा घडामोडींवर दोन्ही अधिकाऱ्यांनी चर्चा केली. व्हाईट हाऊसने ५ नोव्हेंबरला होणाऱ्या निवडणुकीच्या ५ दिवस आधी एका निवेदनाद्वारे या कॉलची माहिती सार्वजनिक केली.

व्हाईट हाऊसने निवेदनात काय म्हटले?

व्हाईट हाऊसने एका निवेदनात म्हटले आहे की, अमेरिकेचे राष्ट्रीय सुरक्षा सल्लागार जेक सुलिव्हन यांनी आज भारताचे राष्ट्रीय सुरक्षा सल्लागार अजित डोवाल यांच्याशी फोनवर चर्चा केली. दोन्ही अधिकाऱ्यांनी प्रादेशिक सुरक्षा घडामोडींवर चर्चा केली आणि इंडो-पॅसिफिक प्रदेशात आणि जागतिक स्तरावर स्थिरता सुनिश्चित करण्यासाठी अधिक प्रयत्नांच्या गरजेवर भर दिला. याशिवाय, निवेदनात अमेरिकेने दोन्ही देशांमधील द्विपक्षीय भागीदारीतील विकासाचे स्वागत केले आहे.

भारत-अमेरिका भागीदारी

भारत आणि अमेरिका यांच्यातील भागीदारीवर पंतप्रधान नरेंद्र मोदी यांनी भर दिला आहे. भारत आणि अमेरिका आज सर्वसमावेशक जागतिक धोरणात्मक भागीदारीचा आनंद घेत आहेत. ज्यामध्ये जवळपास सर्वक्षेत्रांचा समावेश आहे. यात सामायिक लोकशाही मूल्ये, हितसंबंधांचे संरक्षण आणि लोकांमधील चांगले संबंध या मुद्द्यांचा समावेश आहे. तसेच अमेरिका-भारत भागीदारीमध्ये व्यापार आणि गुंतवणूक, संरक्षण आणि सुरक्षा, शिक्षण, विज्ञान आणि तंत्रज्ञान, सायबर सुरक्षा, नागरी आण्विक ऊर्जा, अंतराळ तंत्रज्ञान, स्वच्छ ऊर्जा, पर्यावरण, कृषी आणि आरोग्य यासह अनेक क्षेत्रांचा समावेश आहे.