“काही झाले तरी अमेरिकेला शरण जाणार नाही”; ट्रम्प यांच्या इशाऱ्यानंतर इराणचे सडेतोड उत्तर

Iran Replied To Donald Trump Warning: चर्चेचा अर्थ शरणागती नव्हे, असे इराणने अमेरिकेला स्पष्टपणे सांगितले आहे.

Iran Replied To Donald Trump Warning: अमेरिका आणि इराण यांच्यातील संघर्ष कमी होताना पाहायला मिळत नाही. होर्मुझची सामुद्रधुनी नियंत्रणावरूनही तणाव कामी होताना दिसत नाही. एकीकडे चर्चेच्या फेऱ्या सुरू असल्या तरी दुसरीकडे यातून मार्ग निघत नाही. यातच इराणच्या राष्ट्राध्यक्षांनी अमेरिकेचे राष्ट्राध्यक्ष डोनाल्ड ट्रम्प यांना सडेतोड प्रत्युत्तर दिले आहे. काही झाले तरी इराण हा अमेरिकेला शरण जाणार नाही, असे स्पष्ट केले.

इराणच्या राष्ट्राध्यक्षांनी म्हटले आहे की, अमेरिकेसोबतच्या चर्चेदरम्यान 'शरणागती पत्करण्याचा' इराणचा कोणताही इरादा नाही. चर्चेचा अर्थ शरणागती नव्हे. इराण पूर्ण सन्मान, अधिकार आणि देशाच्या हक्कांचे संरक्षण करत चर्चेत उतरला आहे. कोणत्याही परिस्थितीत इराण आपल्या लोकांच्या आणि देशाच्या कायदेशीर हक्कांपासून मागे हटणार नाही, असे त्यांनी नमूद केले आहे. 

...तर अमेरिका लष्करी कारवाईसाठी पूर्णपणे तयार असेल

डोनाल्ड ट्रम्प यांनी एक विधान केले होते की, कतार, सौदी अरेबिया आणि यूएईच्या सर्वोच्च नेत्यांच्या विनंतीवरून इराणवरील लष्करी हल्ला सध्यापुरता थांबवण्यात आला आहे. कराराबाबत सध्या गंभीर चर्चा सुरू आहे, परंतु जर कोणताही करार झाला नाही, तर अमेरिका लष्करी कारवाईसाठी पूर्णपणे तयार असेल, असा इशारा डोनाल्ड ट्रम्प यांनी दिला होता. 

दरम्यान, इराणसाठी वेळ संपत आला आहे आणि त्यांना त्वरीत हालचाल करावी लागेल, नाहीतर त्यांच्या हाती काहीच उरणार नाही. वेळ अमूल्य आहे, असे सूचक संकेत ट्रम्प यांनी दिले. अमेरिकेच्या राष्ट्राध्यक्षांनी मध्य पूर्वेतील तणावाच्या पार्श्वभूमीवर लष्करी कारवाईचे संकेत दिले होते. तेव्हापासून दोन्ही देशांमधील तणाव अधिकच वाढला आहे. ट्रम्प यांनी वरिष्ठ राष्ट्रीय सुरक्षा अधिकाऱ्यांशी इराणवरील भविष्यातील धोरणावर चर्चा केली असून, आणखी एक बैठक होण्याची शक्यता आहे.