‘मोदींकडून सार्क नेत्यांना आमंत्रण हे चांगले संकेत’

भारताचे भावी पंतप्रधान नरेंद्र मोदी यांचा सोमवारी शपथविधी होत आहे. या सोहळ्यासाठी पाकिस्तानसह अन्य सार्क देशातील नेत्यांना आमंत्रण पाठविणे एक मजबूत आणि सकारात्मक संकेत आहे,

वॉशिंग्टन : भारताचे भावी पंतप्रधान नरेंद्र मोदी यांचा सोमवारी शपथविधी होत आहे. या सोहळ्यासाठी पाकिस्तानसह अन्य सार्क देशातील नेत्यांना आमंत्रण पाठविणे एक मजबूत आणि सकारात्मक संकेत आहे, असे मत अमेरिकेच्या एका वरिष्ठ अधिकार्‍याने व्यक्त केले. दक्षिण व मध्य आशियाकरिता सहायक परराष्ट्रमंत्री निशा देसाई-बिस्वाल म्हणाल्या की, पंतप्रधानांच्या शपथविधीला सार्क नेत्यांनी येणे मजबूत व सकारात्मक संकेत आहेत. शपथविधी सोहळा कसा व्हावा, हा निश्चितच भावी पंतप्रधानांचा निर्णय आहे. बिस्वाल पुढे म्हणाल्या की, ओबामा प्रशासनाकडून भारताच्या नव्या सरकारला पुढील कार्यपद्धतीवर निर्णय घेण्यास वेळ दिला जाईल. त्यानंतरच या आधारे नवी दिल्लीशी संपर्क करण्यात येईल. त्या म्हणाल्या की, लोकसभा निवडणुकीत भारतीयांनी दिलेल्या स्पष्ट कौलामुळे आम्ही उत्साही आहोत. आम्ही संपूर्ण परिसरात सुरक्षा व समृद्धीकरिता भावी पंतप्रधान मोदी व त्यांच्या टीमसह काम करण्यास इच्छुक आहोत. गुजरातमध्ये २००२ मध्ये झालेल्या घटनांबाबत चिंतित असल्याचेही बिस्वाल यांनी स्वीकार केले. अमेरिकेचा दृष्टिकोन याबाबत अधिक स्पष्ट राहिला आहे. पुढे बिस्वाल म्हणाल्या की, भारतीय मतदारांनी भावी पंतप्रधानाच्या रूपाने मोदींना स्पष्ट बहुमत दिले आहे. भारताला निर्धारित लक्ष्य गाठण्यासाठी आम्हीसुद्धा मिळून काम करण्यास तयार आहोत. राष्ट्राध्यक्ष बराक ओबामा यांनी मोदींना दिलेल्या निमंत्रणाबाबत स्पष्ट सांगितले होते की, अमेरिकेत मोदींचे स्वागत आहे. मोदींचे येथे स्वागतच होईल, असेही निशा देसाई यांनी स्पष्ट केले. (वृत्तसंस्था) ते पंतप्रधानपदी विराजमान असल्याने ते ए १ व्हिसा श्रेणीतून अमेरिकेत प्रवेश करतील. अमेरिकेत येणार्‍या सर्व राष्ट्राध्यक्षांसाठी ए १ श्रेणी सर्वश्रेष्ठ आहे. (वृत्तसंस्था)