तेल अवीव - इराणने इस्त्रायलच्या हॉस्पिटलवर मिसाईल हल्ला केल्यानंतर इस्त्रायली संरक्षण मंत्री यांनी तेहरानवर नव्या पद्धतीने हल्ला करण्याची घोषणा केली आहे. त्याशिवाय इराणचे सुप्रीम लीडर अयातुल्ला अली खामेनेई यांनाही संपवण्याचा उघड इशारा त्यांनी दिला आहे. याआधीही इस्त्रायली पंतप्रधान नेतन्याहू यांनी इराणला हल्ल्याची किंमत चुकवावी लागेल असा कठोर इशारा दिला होता.
इस्त्रायलचे संरक्षण मंत्री कॅट्ज म्हणाले की, दक्षिणी इस्त्रायलच्या सोरोका हॉस्पिटलवर बॅलेस्टिक मिसाईलने हल्ला झाला आहे. या हल्ल्यासाठी इराणचे नेते अली खामेनेई यांना वॉर क्राईमसाठी जबाबदार ठरवले आहे. हा हुकुमशाह एका बंकरखाली बसला आहे. जाणुनबुजून इराण इस्त्रायलमधील हॉस्पिटल आणि नागरी वस्त्यांना टार्गेट करत आहे. हे खूप वाईट वॉर क्राइम आहे. याची शिक्षा खामेनेई यांना मिळायला हवी असं त्यांनी म्हटलं.
त्याशिवाय पंतप्रधान बेंजामिन नेतन्याहू यांनीही आयडीएफला इराणमधील महत्त्वाची ठिकाणे, तेहरानमधील सरकार संबंधित वास्तूंवर आणखी जास्त हल्ले करण्याचे निर्देश दिले आहेत. इस्त्रायलला वाढणारा धोका तात्काळ संपवावा आणि खामेनेई सरकार अस्थिर करावे अशा सूचना इस्त्रायली पंतप्रधानांनी दिल्याचे संरक्षण मंत्र्यांनी म्हटलं आहे. संरक्षण मंत्र्यांच्या आधी इस्त्रायलचे पंतप्रधान नेतन्याहू यांनीही खामेनेई सरकारला इशारा दिला आहे. इस्त्रायलमध्ये नागरी वस्त्यांवर आणि हॉस्पिटल हल्ल्याला चोख प्रत्युत्तर देण्याची शपथ त्यांनी घेतली आहे.
दरम्यान, इस्त्रायलने इराणमधील अण्वस्त्र आणि मिसाईल प्रोग्रामला टार्गेट केले आहे. हे ना केवळ आमच्यासाठी तर जगासाठीही धोकादायक होते. मात्र इराण इस्त्रायली हॉस्पिटल, नागरी वस्त्यांमध्ये लहान मुले यांच्यावर हल्ले करत आहे. इराण आणि इस्त्रायल यांच्यात नैतिकता समानता नाही. इस्त्रायल त्या लोकांचा खात्मा करण्यासाठी मागे हटणार नाही जे इस्त्रायल आणि अमेरिकेला मारण्याची घोषणा करतात असंही नेतन्याहू यांनी म्हटलं आहे.
इराणचा हल्ला
इराणने इस्त्रायलवर पलटवार करत इस्त्रायलच्या तेल अवीव, बीर्शेबा, रमतगन आणि होलोन या शहरांवर बॅलेस्टिक मिसाईल डागल्या आहेत. त्यात एक मिसाईल तेल अवीवच्या सोरोका हॉस्पिटलवर पडली. या हल्ल्याने हॉस्पिटलचे मोठे नुकसान झाले. लोकांमध्ये गोंधळ उडाला. या हल्ल्यात अनेकजण जखमी झाल्याचेही पुढे आले आहे.