मी गरीब देशांतील लोकांना अमेरिकेत घुसू देणार नाही; आशिया, आफ्रिकेतील देशांना ट्रम्प यांचा इशारा

जे अमेरिकेसाठी धोकादायक वाटताहेत त्यांना हाकलून देणार, सवलती बंद करण्याची धमकी

वॉशिंग्टन - व्हाइट हाउसनजीक दोन नॅशनल गार्डवरच्या गोळीबारप्रकरणावरून संतप्त झालेल्या अमेरिकेचे राष्ट्राध्यक्ष डोनाल्ड ट्रम्प यांनी गुरुवारी तिसऱ्या जगातून अमेरिकेत येणाऱ्या नागरिकांचे सर्व स्थलांतर थांबवू अशी धमकी दिली आहे. आणि जे परदेशी नागरिक अमेरिकेच्या सुरक्षिततेला धोकादायक वाटत आहेत, त्यांची अमेरिकेतून हकालपट्टी करण्यात येईल अशीही त्यांनी धमकी दिली आहे.

एक्स या सोशल मीडियावरील टूथ सोशल अकाउंटवरून ट्रम्प यांनी बायडन प्रशासनाच्या काळात झालेल्या अफगाणिस्तानातून व अन्य देशातून झालेल्या मोठ्या प्रमाणावरील स्थलांतरावरून माजी अध्यक्ष बायडन यांच्यावर जोरदार टीका केली आहे. या स्थलांतरावर आपण बंदी घालूच पण बायडन व त्यांचे ठग साथीदार यांचे कारनामे विसरणार नाही, असे वक्तव्य ट्रम्प यांनी केले आहे. बुधवारी व्हाइट हाउसनजीक एका अफगाण निर्वासिताने नॅशनल गार्डच्या दोन जवानांवर गोळीबार केला होता.

ग्रीन कार्डची तपासणी

अमेरिकेतील ग्रीन कार्ड धारकांची सखोल पुनर्तपासणी केली जाणार असल्याचे ट्रम्प प्रशासनाने गुरुवारी स्पष्ट केले. तर ट्रम्प यांनी स्थलांतरितांना दिल्या जाणाऱ्या सरकारी सवलती, फायदे कायमस्वरूपी बंद करणार असल्याचीही धमकी दिली आहे. जे स्थलांतरित, निर्वासित देशातील शांतता, स्थैर्य बिघडवण्याचा प्रयत्न करतात, सुरक्षिततेला धोकादायक ठरतात आणि जे पाश्चात्त्य संस्कृतीशी जुळवून घेऊ शकत नाहीत, त्यांनाही हाकलण्यात येईल असे ट्रम्प म्हणाले.

आयकर मुक्त अमेरिका ?

टॅरिफच्या माध्यमातून मोठ्या प्रमाणात महसूल मिळत असल्याने अमेरिकी नागरिकांवरील आयकर रद्द करण्याचा निर्णय प्रशासन घेऊ शकते, असे विधान ट्रम्प यांनी गुरुवारी केले. आमचे प्रशासन देशातील करधोरणात मोठ्या प्रमाणात बदल आणत असून टैरिफ आणल्याने मिळणारा महसूल प्रचंड असेल.त्यामुळे देशातील आयकर रद्द करण्याचा निर्णय सरकार घेऊ शकते. हा आयकर काही प्रमाणात किंवा तो संपूर्णही रद्द केला जाऊ शकतो, असे ट्रम्प म्हणाले.एका नॅशनल गार्डचा मृत्यू

अफगाण निर्वासिताच्या गोळीबारात साराह बेकस्ट्रॉर्म (२०) या नॅशनल गार्डमधील कार्यरत महिलेचा मृत्यू झाला असून अँड्रयू वोल्फ (२४) यांची प्रकृती चिंताजनक असल्याचे ट्रम्प यांनी सांगितले. या हल्लेखोराचे नाव रेहमानुल्ला लकनवाल (२९) असून तो अफगाणिस्तानात अमेरिकी गुप्तचर संघटना सीआयएचा हस्तक म्हणून काम करत होता, असेही ट्रम्प यांनी सांगितले.